Español
Galego
O venres 29 de agosto marcou o final da peregrinación diocesana da Arquidiocese de Santiago de Compostela no Xubileu da Esperanza. Foi unha xornada de regreso, coa mirada posta na viaxe de volta, pero tamén cun último agasallo espiritual antes de partir: a visita ás catacumbas de San Calixto.
Alí, no silencio da terra que garda a memoria dos primeiros cristiáns, os peregrinos dividíronse en dous grupos para percorrer os corredores subterráneos guiados por expertos que desvelaron a historia de fe e martirio que habita naquelas galerías.
Tras o percorrido, todos se reuniron para celebrar xuntos a Eucaristía, presidida polo arcebispo compostelán, monseñor Francisco José Prieto Fernández. Na liturxia, marcada pola memoria do martirio de san Xoán Bautista, lembrouse tamén a tantas testemuñas da fe sepultados naquelas criptas: papas mártires, os primeiros crentes e, de maneira especial, santa Icía.
Con esa celebración cargada de simbolismo pechouse un itinerario que, durante cinco días, uniu a espiritualidade, a comuñón e a beleza de Roma. Despois, chegou o traslado ao aeroporto e o regreso a Galicia, co corazón cheo de experiencias e a certeza de compartir un camiño que vai máis aló da viaxe física.
O balance da peregrinación non puido ser máis positivo. Os participantes expresaron a súa alegría polo vivido: a riqueza das visitas, a fondura da oración e, sobre todo, o fortalecer o espírito de Igrexa diocesana. A proximidade do arcebispo de Santiago, sempre presente en cada xornada, foi outro dos dons máis apreciados polos peregrinos.
Roma despídese, pero o eco desta experiencia xubilar seguirá resoando nas parroquias de Compostela. Porque o vivido non termina no regreso: é semente de comuñón e esperanza que agora xerminará en terra galega.
