A Diocese de Santiago participa na xornada “En clave de sinodalidade” en Madrid

Este sábado, 21 de novembro de 2026, tivo lugar no salón “San Isidoro” da Conferencia episcopal española en Madrid a sesión presencial do curso “En clave de sinodalidade”, organizado polo equipo sinodal da CEE.

A xornada tivo a participación de máis de 70 participantes de varias dioceses, entre eles unha representación da Diocese de Santiago de Compostela, asistindo Alfredo Losada, do equipo sinodal diocesano, e Nieves Lameiro, da delegación para o laicado.

O encontro comezou cunha oración guiada por María José Tuñón, directora do Secretariado da Comisión Episcopal para a Vida Consagrada, sendo o encargado do saúdo e presentación das ponencias da mañá, Mons. Francisco Conesa, bispo de Solsona e bispo referente para o Sínodo.

A clave teolóxica: o proceso sinodal

O encontro contou coa destacada intervención de Dario Vitali, sacerdote, profesor de eclesioloxía na Universidade Gregoriana de Roma e coordinador de expertos do Sínodo sobre a Sinodalidade.

Durante a súa exposición, Vitali afondou nos retos e na riqueza do proceso sinodal que vive a Igrexa:

  • Unha conversión dende a igualdade: o proceso sinodal convida a pasar dunha “Igrexa de acontecementos” (onde se pasa páxina sen afondar) a unha experiencia viva na que o primario é a igualdade de todos como fillos e fillas de Deus, por riba das diferenzas ou funcións.
  • A sinodalidade como navegador: co Reino de Deus como meta, a sinodalidade funciona como o “navegador” que orienta a marcha da Igrexa na actualidade.
  • Escoitar a todo o Pobo de Deus: como o Espírito Santo guía á Igrexa e fai dela un perenne Pentecoste, é fundamental escoitar a todos os bautizados, xa que cada fiel posúe o sentido da fe (sensus fidei).
  • Comunidades vivas en camiño: as parroquias e igrexas locais son seres vivos que camiñan xuntos. O Evanxeo vívese en comunidade, cunha identidade forte que pon a mensaxe de Xesús no centro da vida sen ir en contra de ninguén.

Apertura e compromiso co mundo: a Igrexa aprende do mundo e dialoga con el, acollendo a chamada ao coidado da casa común (Laudato si’) e á fraternidade universal (Fratelli tutti) para achegar o seu don a toda a humanidade.

As experiencias prácticas: o camiño da Diocese de Palencia

A tarde estivo adicada ao desenvolvemento de distintos talleres con experiencias diocesanas, un plenario asembleario e a oración final.

Os talleres foron impartidos por D. Miguel Ángel González, sobre “Como contaxiar sinodalidade”, D. Elías Royón, SJ, sobre “Espiritualidade sinodal, escoita e discernimento”, D. Francisco Conesa, sobre “A eclesioloxía sinodal: retos e desafíos”, D. Dario Vitali, sobre “O Documento Final como acto eclesial”; e Dª. Inmaculada Martín, sobre “Boas prácticas na diocese de Palencia”.

Foi especialmente significativa a experiencia da Diocese de Palencia, exposta pola súa delegada sinodal, Macu Martín, amosando boas prácticas pastorais aterrando as liñas do Documento Final do Sínodo na vida cotiá das parroquias a través de tres eixes principais:

  • Conversión de relacións: fomentando a igualdade bautismal e a corresponsabilidade mediante a incorporación activa de laicos e mulleres na dirección diocesana, así como a creación de espazos sinxelos de acollida e escoita aos máis illados ou á mocidade. Por exemplo, encontros «en torno a un café» nos que parroquias e barrios abren locais e faise sitio a quen vive só ou é un novo veciño; ou unha “maleta viaxeira”, que vai de parroquia en parroquia, de comunidade relixiosa en colexio e en cada parada recolle boas prácticas.
  • Conversión de procesos: promovendo a toma de decisións compartidas a través de consultas previas antes dos nomeamentos pastorais, asembleas parroquiais abertas e a planificación e avaliación conxunta dos plans pastorais.
  • Conversión de vínculos: mantendo viva a comuñón tecendo redes entre parroquias veciñas (co programa «Coñece as túas parroquias» onde pobos veciños visítanse e descobren igrexas, tradicións e tarefas pastorais), celebrando encontros de consellos de pastorais e colaborando con outras dioceses a través de redes rexionais como “Igrexa en Castela”.

Esta xornada supuxo unha oportunidade fundamental para intercambiar experiencias e seguir impulsando o discernimento e o traballo conxunto nas nosas comunidades diocesanas.

Previous article«Reinar es amar, servir y cuidar»: el mensaje del arzobispo en la solemnidad de Cristo Rey
Next articleLas cinco diócesis gallegas pondrán nombre y rostro a su labor en la presentación de la Memoria de Actividades 2025