Xubileu do Arciprestado do Salnés

A parroquia de San Xenxo de Padriñán, en Sanxenxo, converteuse este domingo no corazón espiritual do Arciprestado do Salnés coa celebración do Xubileu, un encontro de fe que reuniu a máis dun milleiro de fregueses procedentes de 99 parroquias e 17 concellos da comarca.

A xornada comezou ás cinco e media da tarde cun tempo de confesións, no que numerosos sacerdotes atenderon os fieis que desexaban obter as grazas xubilares. A continuación, tivo lugar a solemne Eucaristía, presidida polo arcebispo de Santiago de Compostela, monseñor Francisco José Prieto Fernández, e concelebrada por vinte e cinco sacerdotes do arciprestado.

A celebración foi o culmen dun ano xubilar no que as comunidades parroquiais do Salnés participaran en charlas, encontros e celebracións penitenciales. Durante a súa homilía, o arcebispo Prieto Fernández animou aos presentes para “seguir traballando con alegría, sendo unha Igrexa peregrina, próxima aos mozos, aos nenos e aos enfermos”. Convidou ademais os fieis a ser “artesáns da vida e da paz”, destacando que o cristianismo, na súa esencia, “é unha arte que cultiva valores e virtudes”.

O mal tempo obrigou a modificar os plans previstos para a procesión final, que nun principio ía percorrer as rúas de Sanxenxo acompañando á imaxe da Virxe do Carmen. A choiva impediu saír ao exterior, polo que a procesión realizouse dentro do templo, nun ambiente recolleito e emotivo. “Vestiunos a choiva”, comentaban algúns asistentes con resignada sorriso, mentres portaban as velas acesas que simbolizaban a luz do Xubileu.

Cada fregués recibiu unha vela, un adhesivo co anagrama do arciprestado e unha pequena cruz elaborada de maneira gratuíta e xenerosa por un veciño, xesto que foi especialmente valorado polos organizadores. Ao finalizar a cerimonia, o arcebispo bendixo unha gran cruz conmemorativa, en representación da unidade de todas as parroquias do Salnés.

A celebración concluíu cun ambiente de gratitude e comunidade. “Foi moi bonito, un día que nos uniu a todos”, resumían algúns fregueses ao saír do templo. A choiva non embazou a emoción dun Xubileu que, máis que unha clausura, pareceu o comezo dunha nova etapa de compromiso e esperanza para a Igrexa do Salnés.