- San Domingos de Bonaval acolle un acto multitudinario con destacada presenza institucional, eclesiástica e confrade
- Víctor Suárez Gondar emociona cun pregón profundo que recorre a historia, o sentido e a esencia das confradías compostelás
- Autoridades subliñan o valor cultural, espiritual e turístico dunha celebración que segue creciendo en participación e relevancia
Unha apertura institucional que destaca o valor colectivo da Semana Santa
A presidenta da Xunta de Confrarías, Elena Bernárdez, foi a encargada de dar a benvida oficial ao acto, dirixíndose aos asistentes con palabras de acollida e agradecemento. Na súa intervención inicial, puxo en valor a importancia da Semana Santa como elemento de cohesión social e tradición viva, ademais de introducir a participación musical da Banda de Tambores e Cornetas do Santísimo Cristo da Victoria de León, que acompañou o desenvolvemento do acto desde os seus primeiros compases.
Tras a interpretación inicial da banda, tomou a palabra Rubén Marcuño, irmán maior da Confraría da Humildade, quen asumiu a responsabilidade de presentar o pregoeiro. No seu discurso, Marcuño destacou o significado especial do ano 2026, previo ao Ano Santo Compostelán, así como o papel activo da súa confraría na organización do pregón e na elaboración do cartel da Semana Santa.
O irmán maior quixo ademais expresar un profundo agradecemento a todas as persoas implicadas na organización, así como ás institucións que colaboraron na celebración do acto. De forma especial, dedicou palabras de recoñecemento ao pregoeiro, a quen definiu como unha figura próxima, comprometida e profundamente vinculada á vida espiritual da cidade.
“Non é un acto calquera para nós -afirmou-, é un proceso de escoita que debemos interiorizar e que nos acompañará durante toda a Semana Santa”.
Un pregón que percorre a historia e a alma de Santiago
O momento central da xornada chegou ás 17.50 horas coa intervención do pregoeiro, Víctor Suárez Gondar (Xuíz eclesiástico, Cóengo da Catedral de Santiago de Compostela. Párroco de Santo Frutuoso, Santa María de Grixoa e Santa María de Chaián) quen ofreceu un discurso de gran carga poética, espiritual e reflexiva que cativou aos asistentes.
Desde o inicio da súa intervención, o pregoeiro apelou á emoción e á conciencia colectiva, convidando os presentes a vivir a Semana Santa desde unha mirada profunda: “O que hoxe anunciamos non é só memoria, é un latexado vivo da historia”.
Ao longo do seu discurso, Suárez Gondar trazou un percorrido pola orixe e a evolución das confrarías, destacando o seu nacemento como resposta ao sufrimento humano e o seu papel esencial como espazos de acompañamento, solidariedade e fe activa. Lonxe de entendelas como simples elementos decorativos ou tradicionais, definiunas como expresións vivas do Evanxeo.
O pregoeiro tamén dirixiu interpelacións directas ao público, expondo preguntas que convidan á introspección: “A quen lle está faltando hoxe o voso amor? Quen espera en silencio unha presenza, unha palabra?”
Un dos aspectos máis destacados da súa intervención foi o percorrido detallado polas distintas confrarías compostelás, evocando as súas imaxes, as súas procesións e o seu significado dentro do conxunto da Semana Santa. Desde a figura da Virxe dos Dolores ata o Cristo Nazareno, pasando polas irmandades máis antigas e as de creación máis recente, o pregón puxo en valor tanto a tradición como a renovación xeracional.
Especial atención dedicou á implicación da mocidade, destacando iniciativas que buscan achegar a fe ás novas xeracións e garantir a continuidade desta celebración. Neste sentido, subliñou que a Semana Santa “non é só mirar, é tomar as rúas e vivir a fe”.
O discurso tamén incidiu no valor do silencio, a penitencia e a reflexión, elementos esenciais das procesións compostelás, así como na importancia da esperanza como fío condutor de toda a celebración.
Recoñecemento institucional a unha tradición viva A continuación, deuse paso ás intervencións das autoridades presentes. En primeiro lugar, tomou a palabra o director da Axencia Turismo de Galicia, Manuel Merelles Remy, quen interveu en representación do presidente da Xunta de Galicia.
No seu discurso, Merelles destacou a relevancia histórica da Semana Santa compostelá, lembrando as súas orixes no século X e a súa evolución ata a actualidade, con 17 procesións organizadas por 11 confrarías: “A Semana Santa é unha parte esencial da nosa cultura e identidade”.
Unha celebración que define a identidade da cidade
Pola súa banda, o delegado do Gobierno en Galicia, Pedro Blanco Lobeiras, centrou a súa intervención no carácter colectivo da Semana Santa e no seu papel como elemento definitorio da identidade compostelá.
“A Semana Santa é unha forma de entender Santiago”, sinalou, destacando a transformación que vive a cidade durante estes días sen perder a súa esencia. Neste sentido, puxo en valor a capacidade de acollida de Compostela, así como o papel da Catedral como símbolo universal.
Blanco Lobeiras tamén quixo destacar o esforzo constante das confrarías e de todas as persoas que fan posible esta celebración, subliñando o seu traballo silencioso ao longo de todo o ano.
Así mesmo, incidiu na dimensión reflexiva da Semana Santa, sinalando que convida a deterse e mirar cara ao interior nun contexto marcado pola rapidez e a inmediatez.
O arcebispo convida a vivir a Semana Santa como un camiño de fe e esperanza
A Clausura da primeira parte do acto correu a cargo do arcebispo de Santiago de Compostela, monseñor Francisco José Prieto Fernández.
Nas súas palabras, o arcebispo destacou a capacidade de Santiago para converterse en lugar de encontro e peregrinación, especialmente durante a Semana Santa, cando “a cidade abre as súas portas e todos nos facemos peregrinos”.
Lonxe de entender a celebración como un simple recordo do pasado, mons. Prieto Fernández subliñou a súa vixencia actual: “Non contemplamos unha memoria afastada, senón unha fe que quere facerse luz, silencio e vida”.
O arcebispo tamén reflexionou sobre o significado da cruz, a paixón e a resurrección, sinalando que a Semana Santa percorre os mesmos camiños da vida cotiá, coas súas dificultades, esperanzas e desafíos.
Na súa mensaxe final, convidou os asistentes a vivir estes días con intensidade e apertura: “A última palabra sempre é vida e esperanza”.
A música pon o broche a unha xornada de emoción e solemnidade
Tras a clausura institucional, o acto continuou cun concerto da Banda de Tambores e Cornetas do Santísimo Cristo da Victoria de León, que interpretou diversas marchas procesionais como “Creo en ti” e “A Paixón”, entre outras.
A formación, fundada en 1994 e considerada un referente no noroeste de España, foi presentada por Rubén Marcuño, quen destacou a súa calidade musical e a súa afinidade coa forma de vivir a Semana Santa en Galicia.
O concerto puxo o broche final a unha xornada que non só serviu para inaugurar oficialmente a Semana Santa 2026, senón tamén para reafirmar o compromiso da cidade cunha tradición que combina fe, cultura, historia e comunidade.
Con este pregón, Santiago de Compostela prepárase xa para uns días nos que as súas rúas volverán encherse de procesións, silencio, emoción e participación, consolidando unha celebración que, ano tras ano, segue crecendo e fortalecendo o seu papel como un dos grandes referentes do calendario relixioso e cultural galego.
