Muxía será sede da II Xornada de Pastoral do Turismo da Arquidiocese de Santiago

 Hoxe xoves, 4 de xuño, tivo lugar en Santiago de Compostela unha reunión de traballo centrada na preparación da II Xornada de Pastoral do Turismo, unha iniciativa que celebrará a súa nova edición o próximo 18 de setembro en Muxía.

O encontro tivo lugar ás 12.00 horas nas instalacións de Santo Martiño Pinario e contou coa participación do vigairo de Pastoral, Javier Porro Martínez, así como da Delegación de Pastoral do Turismo, representada polo seu delegado, Juan Ventura Martínez Reboeiras. Á reunión tamén asistiron membros doutras delegacións e persoas colaboradoras implicadas na organización desta xornada.

Durante a sesión abordáronse distintos aspectos relacionados coa coordinación e preparación da cita, que volverá reunir a persoas vinculadas ao ámbito da pastoral turística na Diocese. Os asistentes compartiron impresións e avanzaron nos traballos necesarios para garantir o bo desenvolvemento desta segunda edición.

A Xornada de Pastoral do Turismo consolidouse como un espazo de encontro, reflexión e colaboración entre quen traballa na acollida, o acompañamento e a atención pastoral das persoas que visitan distintos destinos da comunidade, especialmente aqueles vinculados ao fenómeno das peregrinacións e ao patrimonio relixioso.

Desde a organización quixeron trasladar unha invitación aberta a todas as persoas interesadas para que reserven xa nas súas axendas a data do próximo 18 de setembro e poidan participar nesta nova convocatoria que terá como escenario a localidade de Muxía.

Así mesmo, anunciaron que nas próximas semanas daranse a coñecer máis detalles sobre o programa de actividades, contidos e participantes que formarán parte desta segunda Xornada de Pastoral do Turismo, actualmente en fase de elaboración.