Conferencia da delegada de Ensino, Begoña Díaz, no ISCCR

Esta foi unha das mensaxes que transmitiu a delegada episcopal de Ensino da nosa Arquidiocese, Begoña Díaz, na segunda xornada do curso de actualización teolóxico pastoral que se celebra no Instituto Superior Compostelán de Ciencias Relixiosas.

A relatora afirmou que “a dimensión intelectual ten que vincular a Igrexa coa sociedade porque a Igrexa acepta á nosa sociedade, pero, en moitos casos, a sociedade non acepta a Igrexa”. Neste sentido, afirmou que unha das tarefas prioritarias de calquera bautizado en xeral, pero especialmente dos profesores de relixión, é formarse en todos os aspectos para que a parte da sociedade que non acepta a Igrexa perda os seus receos e os seus prexuízos.

Begoña Díaz fixo unha acesa loa do ISCCR, centro no que se formou teológicamente. Segundo a súa propia confesión, nas súas aulas aprendeu a saber falar e escribir de Deus, a valorar e respectar todas as sensibilidades espirituais, a utilizar os recursos da sociedade do coñecemento, a buscar a Verdade e transmitila sen complexos, a vivir con coherencia evanxélica, a ter dimensión eclesial, a sabernos Igrexa, a saber pedir perdón, a comunicar a fe, a camiñar ao ritmo do máis lento, a ter espírito comunitario, a ser capaces de ver a inxustiza e denunciala.

Terminou a súa exposición explicando os requisitos que debe superar na actualidade un candidato para ser profesor de relixión. E lembrou que a DEI (Declaración Eclesiástica de Idoneidade) sempre “nos compromete a formarnos e a levar unha vida cristiá”.

As xornadas clausuraranse o vindeiro martes 3 de decembro coa conferencia Desafíos actuais da educación relixiosa en España, a cargo de Antonio Roura, Director do Secretariado da Comisión Episcopal para a Educación e Cultura e de revístaa Relixión e Escola e antigo alumno do Instituto Teolóxico Compostelán.

Como sempre, a charla comezará ás 19h. na aula Magna do Instituto Teolóxico Compostelán, no mosteiro de San Martiño Pinario. As conferencias están dirixidas a todos os laicos comprometidos coa formación e, dun modo moi especial, aos profesores de relixión.