O arcebispo de Santiago visita as Hermanitas dos Anciáns Desamparados de A Coruña

O arcebispo de Santiago de Compostela, monseñor Francisco José Prieto Fernández, visitou este domingo, 22 de marzo, a residencia das Hermanitas dos Anciáns Desamparados na Coruña, onde presidiu a celebración da Eucaristía con motivo do V Domingo de Coresma. Na Eucaristía estivo acompañado polo capelán Jesús Barrientos Lema e pola comunidade relixiosa, residentes e traballadores do centro.

Durante a súa homilía, o prelado centrou a súa reflexión no Evanxeo de San Xoán, que recolle a resurrección de Lázaro, subliñando a mensaxe central de Cristo como fonte de vida e esperanza. “Eu son a resurrección e a vida”, lembrou, destacando que esta afirmación constitúe o núcleo da fe cristiá, especialmente no tempo litúrxico que conduce á Semana Santa.

Así mesmo, animou aos fieis para ser testemuñas da vida no seu día a día, a través do coidado concreto dos demais, especialmente dos máis vulnerables. “Toda a vida e todas as vidas han de ser coidadas”, afirmou, nunha mensaxe especialmente significativa no contexto da residencia.

O centro das Hermanitas dos Anciáns Desamparados, situado na Rúa Santa Tareixa de Jornet, dedícase ao coidado integral de persoas maiores en situación de vulnerabilidade. O seu labor fundaméntase nos valores do Evanxeo, ofrecendo atención tanto ás necesidades materiais como espirituais dos residentes, nunha contorna que busca ser familiar e próxima.