Español
Galego
- Os seminaristas do Seminario Maior Interdiocesano “Apóstolo Santiago” celebraron unha vixilia de oración na capela do centro
- As reliquias tamén foron expostas Xunto ao altar mor da Catedral durante a celebración diocesana de san Xoán de Ávila
A capela do Seminario Maior Interdiocesano “Apóstolo Santiago” acolleu o pasado xoves 7 de maio unha vixilia de oración presidida polos seminaristas do centro con motivo da chegada a Santiago de Compostela das reliquias de san Xoán de Ávila. O acto desenvolveuse nun ambiente de recollemento e devoción, marcado pola relevancia espiritual dunha visita que forma parte do itinerario que as reliquias do santo están a realizar por distintos seminarios de España.
A presenza das reliquias na capital compostelá enmárcase no Ano Xubilar concedido con motivo do quinto centenario da ordenación sacerdotal de san Xoán de Ávila, unha efeméride que a Igrexa celebra ata o próximo 31 de maio na Basílica Pontificia de Montilla, lugar onde se veneran os restos do santo andaluz, coñecido historicamente como o “Mestre de Santos”.
Durante a vixilia, os seminaristas participaron nun tempo de oración comunitaria ante as reliquias do doutor da Igrexa, figura especialmente vinculada á formación sacerdotal e á renovación espiritual. A celebración puxo de relevo o significado que a figura de san Xoán de Ávila continúa tendo para as novas xeracións de futuros sacerdotes, especialmente no contexto do discernimiento vocacional e a vida de seminario.
Alén da celebración no Seminario Maior Interdiocesano, as reliquias de san Xoán de Ávila permaneceron expostas xunto á altar maior da Catedral de Santiago, coincidindo coa celebración diocesana da festividade do santo.
No marco desta celebración diocesana rendeuse homenaxe a 27 sacerdotes da arquidiocese que conmemoraron os seus aniversarios de ordenación sacerdotal. En concreto, celebráronse os 60, 50 e 25 anos de ministerio presbiteral destes sacerdotes.
A chegada das reliquias a Santiago constitúe unha das etapas do amplo percorrido organizado con motivo do Ano Xubilar avilista, unha iniciativa que busca achegar a figura e o legado espiritual do santo a diferentes comunidades eclesiais e centros de formación sacerdotal do país.
San Xoán de Ávila, referente espiritual e mestre de vida interior, mantén unha profunda pegada na tradición eclesial española. O seu testemuño, centrado na entrega pastoral e na formación do clero, continúa sendo motivo de inspiración para numerosas comunidades cristiás. A celebración vivida tanto na Catedral compostelá como no Seminario Maior Interdiocesano “Apóstolo Santiago” quixo precisamente subliñar esa dimensión de proximidade espiritual e de continuidade entre a herdanza do santo e a realidade actual da Igrexa.
