- O arcebispo de Santiago, mons. Francisco José Prieto Fernández, presidiu a celebración do patrón do Seminario Maior Interdiocesano en San Martiño Pinario.
- A caridade, a acollida e a esperanza centraron a reflexión de monseñor Francisco José Prieto.
O Seminario Maior Interdiocesano Apóstolo Santiago, que reúne os seminaristas das dioceses de Santiago de Compostela, Mondoñedo-Ferrol e Tui-Vigo, celebrou este mércores 11 de novembro a festividade do seu patrón, San Martiño Pinario, cunha solemne eucaristía presidida polo arcebispo de Santiago, monseñor Francisco José Prieto Fernández, na capela do histórico complexo de San Martiño Pinario.
A celebración contou coa presenza do bispo de Tui-Vigo, monseñor Antonio Valín; o arcebispo emérito de Santiago, monseñor Julián Barrio; así como o vicario xeneral, o reitor do Seminario Maior Interdiocesano xunto ao equipo formativo, o reitor do Seminario Menor, o deán da Catedral, seminaristas, membros do claustro de profesores, sacerdotes, relixiosos e relixiosas, así como representantes das Forzas e Corpos de Seguridade do Estado e de diversas institucións civís.
Durante a homilía, monseñor Prieto tomou como referencia un dos episodios máis coñecidos da vida de San Martiño Pinario, o da capa compartida cun esmoleiro, para subliñar o valor dunha existencia marcada pola caridade evanxélica. O arcebispo lembrou que aquel xesto resume toda unha vida entregada ao servizo e sinalou que «só podemos esperar a esperanza do ceo cando sabemos recoñecer a Cristo nos máis pequenos».
A partir da pasaxe evanxélica de Mateo 25, invitou os presentes a desenvolver unha mirada sensible ante as necesidades de quen sofre soidade, exclusión ou distintas feridas persoais. Neste sentido, animou a non permanecer indiferentes ante o dor allea. «Non miremos cara a outro lado, non baixemos a mirada», exhortou, insistindo en que a esperanza cristiá debe facerse visible a través de xestos concretos de acollida, misericordia e reconciliación.
O prelado dirixiu tamén unha mensaxe particular aos seminaristas e a toda a comunidade eclesial, a quen alentou a situar a Cristo no centro da vida e da acción pastoral. Lembrou que a auténtica caridade non busca recoñecemento nin protagonismo, senón que nace da proximidade discreta e sincera ás persoas.
Dirixíndose especialmente aos seminaristas, monseñor Prieto puxo como exemplo a hospitalidade que caracteriza a tantas persoas que reciben aos peregrinos no Camiño de Santiago. Animounos a facer seu ese espírito de acollida e a lembrar que a caridade nace do encontro co outro e exprésase en xestos concretos de proximidade.
O arcebispo concluíu a súa homilía destacando que a vocación sacerdotal require crecer en fraternidade e servizo. «A Eucaristía é a mellor escola para aprender a fraternidade», afirmou, antes de advertir de que as divisións e as ideoloxías poden chegar a desdebuxar a auténtica mensaxe do Evanxeo.
