Xornada de xaxún, solidariedade e presentación da campaña de Mans Unidas en Santa Uxía de Ribeira

  • A parroquia de Santa Uxía de Ribeira acolleu os actos centrais de sensibilización da Campaña de Mans Unidas. 
  • O arcebispo de Santiago, mons. Francisco Prieto, apelou ao compromiso diario fronte á indiferenza.
A parroquia de Santa Uxía de Ribeira converteuse o venres 6 en escenario dunha xornada de concienciación e compromiso solidario con motivo da 67ª campaña de Mans Unidas contra a fame, que este ano levou por lema “Declara a guerra á fame”. A convocatoria, enmarcada na Xornada do Xaxún Voluntario, reuniu a voluntarios e fieis nunha programación orientada á concienciación social, a reflexión cristiá e o apoio ás persoas máis vulnerables.
Os actos comezaron ás 18:45 horas coa presentación da Campaña 2026 de Mans Unidas. Posteriormente, ás 19:00 horas, celebrouse a eucaristía presidida polo arcebispo de Santiago de Compostela, monseñor Francisco José Prieto Fernández, e concelebrada polo párroco, Alfonso Mera Nogueiras, e polo Consiliario de Mans Unidas da Vigairía de Santiago, José Manuel Iglesias Prado.

Unha invitación a converter a fe en compromiso

Na homilía, o arcebispo agradeceu de maneira especial o labor dos voluntarios de Mans Unidas e a acollida da parroquia de Santa Uxía, destacando o valor do traballo constante de quen sostén a campaña. Subliñou que a proposta de “declarar a guerra á fame” diríxese contra as situacións de inxustiza, e presentouna como unha chamada a que cada crente fixese da súa vida un compromiso real.
O arcebispo sinalou que a loita contra a fame pasa por promover a xustiza e a paz. E engadiu que as diversas formas de fame só se reducen cun compromiso verdadeiro e convidou os fieis a examinar a súa vida á luz do Evanxeo e a coherencia das súas accións.

Máis alá da falta de alimentos

Monseñor Prieto tamén lembrou que a fame tamén se manifesta na falta de xustiza, vivenda, traballo e dereitos básicos para unha vida digna. Engadiu que a soidade e a ausencia de acompañamento son outras formas de pobreza hoxe moi presentes.
O arcebispo alertou do risco da indiferenza e da comodidade, e convidou a non mirar cara a outro lado ante o sufrimento alleo. Retomando a pregunta bíblica “Onde está o teu irmán?”, subliñou a responsabilidade de cada persoa cara aos demais.
Neste sentido, animou a mirar a quen está preto e poden necesitar axuda, e lembrou que a fe cristiá esixe coherencia entre a Eucaristía e a atención a quen carece do necesario.

Manifesto contra a Fame

A programación proseguiu ás 20.00 horas coa lectura do Manifesto contra a fame por parte de varios participantes. O texto subliñou que apostar polos dereitos humanos, o ben común e a xustiza social é clave para construír sociedades pacíficas e prósperas, e advertiu dun retroceso global en materia de paz, con 59 conflitos armados activos e millóns de persoas afectadas pola pobreza e a fraxilidade institucional. Tamén denunciou o escaso investimento en procesos de paz fronte ao gasto militar e reclamou maior implicación de gobernos e cidadanía, así como unha educación para a paz baseada na fraternidade e a convivencia. O manifesto lembrou ademais que a fame pode converterse en “unha arma silenciosa” nos conflitos e apelou á responsabilidade colectiva para erradicala.

A xornada concluíu ás 20.30 horas cun “arroz solidario”, dentro da chamada Cea da fame, un xesto simbólico que evocou a realidade de quen xaxúa por necesidade. Os donativos recolleitos destináronse a proxectos apoiados por Mans Unidas.

Unha carta pastoral centrada na dignidade humana

Con motivo desta Xornada de Mans Unidas, o arcebispo de Santiago escribiu unha carta pastoral na que pon o foco nunha das realidades máis dolorosas e urxentes do noso tempo: a fame que sofren millóns de persoas no mundo e que constitúe unha grave ferida para a dignidade humana.

Á luz da Palabra de Deus e do maxisterio social da Igrexa, o arcebispo lembra que a loita contra a fame non é só unha cuestión asistencial, senón un compromiso de xustiza e de amor fraterno que interpela directamente á conciencia cristiá.

Esta carta é, por tanto, unha chamada a toda a comunidade diocesana a unir oración, formación e compromiso concreto para traballar por un mundo máis xusto e solidario, no que ninguén careza do pan necesario para vivir con dignidade.

Previous articleBoletín oficial de xullo-setiembro (2025)
Next articleCamiño de Santiago, unha vía de humanidade, coidado e esperanza

RELATED ARTICLESMORE FROM AUTHOR