O arcebispo de Santiago visita a exposición de beléns de Mans Unidas no marco do “Nadal Solidario”

O arcebispo de Santiago, mons. Francisco Prieto, visitou hoxe a exposición de beléns organizada por Mans Unidas de Santiago de Compostela, unha das actividades centrais do programa Nadal Solidario, iniciativa que busca promover a solidariedade e o espírito do Nadal na cidade.

A mostra, instalada na Rúa Alfredo Brañas, reúne unha variada colección de beléns do mundo cedidos por Teresa Rey Barreiro. A exposición forma parte da Tenda Solidaria de Mans Unidas, onde tamén é posible adquirir flores de Pascua, cuxa venda contribúe a soster os proxectos solidarios da organización.

A exposición permanecerá aberta do 4 ao 31 de decembro, con horario de 10:30 a 14:00 e de 17:00 a 20:00 en días laborables, e de 11:00 a 13:30 e de 17:30 a 20:00 os días festivos.

Durante a súa visita, o arcebispo valorou o traballo de Mans Unidas e animou á cidadanía para achegarse a esta proposta que combina tradición, cultura e compromiso social.