Español
Galego
- Mons. Francisco Prieto: “O voluntariado é o rostro de Cáritas”
Os voluntarios constitúen o piar básico e insustituíble da entidade
O arcebispo, monseñor Francisco José Prieto Fernández, presidiu a Xornada de Formación dos voluntarios de Cáritas Diocesana de Santiago de Compostela. Na súa intervención o prelado lembrou que “o voluntariado é o rostro de Cáritas e desenvolve a súa misión acollendo e acompañando as persoas necesitadas”. Ao encontro, celebrado en dependencias do colexio La Salle, acudiron preto de tres centenares de axentes procedentes de toda a diocese que compartiron un espazo de formación e debateron aspectos de máxima actualidade para o acompañamento, así como temas legais e máis operativos do voluntariado e os códigos de conduta e ético. A Xornada serviu para abordar experiencias e testemuños, coñecer distintas realidades do voluntariado en Cáritas, e falar dun espazo de unidade diocesana.
Na súa intervención monseñor Prieto insistiu en que “o corazón de Cáritas palpita e achégase outros corazóns feridos que necesitan da nosa axuda”.
Pola súa banda Pilar Farjas, directora de Cáritas Diocesana lembrou aos axentes que é fundamental traballar xuntos para ter coñecemento “do que somos e como nos organizamos”. Insistiu tamén en que os voluntarios son o eixo fundamental de Cáritas que “traballan na acollida das persoas”
Voluntarios
En Cáritas as persoas voluntarias constitúen o piar básico e insubstituíble da súa acción, “é a realización do compromiso comunitario, fraterno, solidario e cos últimos. Trátase dunha experiencia humana que se realiza na xustiza e transcéndese na caridade”. Nestes termos expresáronse Santiago Fernández e Jorge Piñeiro do departamento de Animación Comunitaria.
O voluntario é unha persoa que, de forma libre, opta por dedicar parte do seu tempo, de maneira altruísta, solidaria e responsable, traballando en equipo para crear un mundo máis xusto.
Considera a persoa como centro da acción social, “defendemos a súa dignidade, recoñecemos as súas capacidades, impulsamos as súas potencialidades e promovemos a súa integración e desenvolvemento”. 
Soidade non desexada
Os integrantes da comisión diocesana de Soidade non Desexada, Íñigo Arranz e Patricia Camiña referíronse a esta como “a percepción das relacións interpersoais que mantemos son insuficientes ou non son da calidade ou intensidade que desexariamos”.
Os grupos de traballo, en total 16, reflexionaron sobre a soidade non desexada, os seus efectos e como dar resposta desde as Cáritas parroquiais. Fixérono profundando en aspectos relacionados con a detención, prevención, sensibilización e intervención.
Estatutos
Rubén Iglesias secretario da comisión redactora dos Estatutos, foi o encargado de presentalos mencionando que constan de 63 artigos e XI capítulos, e na súa redacción buscouse simplificar as actividades, o voluntariado, o traballo das Cáritas e a configuración do fondo dentro da Comunicación Cristiá de Bens.
No texto reflíctense principios fundamentais como son identidade, misión e compromiso coa acción caritativa e pastoral no ámbito diocesano.
Cítanse aspectos relacionados coa solidariedade, independencia, transparencia e rendición de contas, e a sustentabilidade social, económica e medio ambiental As funcións enmárcanse como accións asistenciais e sociais, de sensibilización, e análise e denuncia das situacións de inxustiza social.
Igualdad de oportunidades
Tatiana Conde, coordinadora da Comisión de seguimento do Plan de Igualdade de Cáritas, encargouse de presentar esta norma da que dixo que era un documento fundamental, de xustiza, aberto e participativo.
Sinalou como obxectivos os de dispoñer dunha entidade equilibrada entre homes e mulleres, unha formación baseada na igualdade e un ambiente de traballo sen acoso.
Normas económicas
As normas económicas financeiras foron expostas por María Tojo, coordinadora do departamento de Recursos Económicos. Sinalou que só poderán realizar operacións bancarias as persoas con autorización expresa. Que estas se refiren a apertura e xestión de contas correntes, cadernos de aforro e IPF.
Para a disposición de fondos será necesario sempre a firma conxunta de dúas persoas das autorizadas na conta.
Todos os cambios nas contas serán comunicados a través dun documento asinado polo representante de Cáritas.
Aconséllase ter unha única conta e revisar estas, e se non teñen movemento ao longo do ano, recoméndase a súa cancelación.
Finalmente indicou que sempre que sexa posible realizaranse as operacións de cobranzas ou pago a través da entidade bancaria e non en efectivo.
Eucaristía
O arcebispo, monseñor Prieto Fernández acompañado de consiliarios, presidiu unha Eucaristía no templo dos Carmelitas. Na súa homilía lembrou que as Cáritas son un mosaico de vida e de axuda aos demais.
Para o prelado a misión do voluntario está relacionada coa caridade. Considera que cada acompañamento escríbese desde a atención aos que máis o necesitan.
Manual de estilo
