Español
Galego
A igualdade de oportunidades como principio fundamental
A igualdade de oportunidades como principio fundamental Un dos trazos que definen os Campamentos de Arnela é a súa vocación en igual de oportnuidades. Co obxectivo de que ningunha familia quede excluída por motivos económicos, Cáritas facilita diferentes modalidades de bolsas, axudas e descontos adaptados a cada situación.
Durante este verán, ao redor de 158 participantes contaron con algún tipo de apoio económico, unha cifra que reflicte o firme compromiso da entidade coa igualdade de oportunidades e o acceso universal ao lecer educativo.
“Detrás de cada axuda hai unha oportunidade para que un neno ou unha nena poida vivir unha experiencia que favoreza o seu desenvolvemento, as súas relacións e o seu benestar. Garantir ese acceso forma parte da misión de Cáritas e da nosa aposta por unha sociedade máis xusta e mellor”, engade Pilar Farjas.
Un voluntariado que sostén o proxecto
O éxito e a continuidade de Arnela non serían posibles sen a implicación dun amplo equipo de persoas voluntarias. Máis de 40 colaboradores participan cada verán na organización e desenvolvemento dos campamentos, achegando de forma altruísta tempo, dedicación e compromiso.
Moitos deles comezaron a súa vinculación con Arnela sendo participantes e anos despois regresan como monitores, directores de tempo libre ou persoas voluntarias, contribuíndo a manter vivo o espírito do proxecto.
“Non podemos falar de Arnela sen poñer en valor ao noso voluntariado. Son persoas que acompañan, escoitan, educan e convértense en referentes para moitos nenos e adolescentes. Ademais, gran parte dese compromiso continúa durante todo o curso escolar noutros proxectos de lecer educativo de Cáritas, xerando vínculos estables e procesos de acompañamento que van moito máis alá do verán”, explica Carlos Juiz, director de Cáritas Interparroquial de Santiago.
“O máis emocionante é comprobar como quen un día chegaron sendo nenos volven anos despois para axudar a outros a vivir a mesma experiencia. Esa é a verdadeira forza de Arnela”, conclúe.
Unha segunda casa para os que crecen en Arnela
Máis aló das cifras e das actividades, o verdadeiro valor de loa Campamentos Arnela atópase nas experiencias que viven os nenos, nenas e adolescentes que participan cada verán. Para moitos deles, o campamento convértese nun espazo de referencia onde construír amizades, gañar confianza e sentirse aceptados tal e como son.
Rodrigo, participante dos campamentos, resume así o que significa Arnela para el. “Para min Arnela é un lugar onde podo xogar libremente, onde sinto que podo ser eu, onde podo correr con liberdade e facer bos amigos. Aquí a xente preocúpase por min.
Facemos actividades divertidas, pero tamén é un lugar onde podo mostrarme tal e como son e non teño que finxir ser outra persoa. Arnela é unha segunda casa para min”.
Un sentimento compartido por moitas das persoas que pasaron por este proxecto durante as últimas décadas e que explica por que, máis de medio século despois da súa creación, Arnela segue sendo unha experiencia capaz de xerar recordos indelebles, fortalecer valores e crear comunidade.
Porque para miles de nenos, novos, familias e persoas voluntarias, Arnela non é soamente un campamento de verán. É unha experiencia que permanece na memoria e que segue transformando vidas xeración tras xeración.
Os Campamentos de Verán de Arnela forman parte do programa Cativeiros, de Cáritas Interparroquial de Santiago. Esta iniciativa conta, entre outros, con financiamento da Xunta de Galicia no marco da convocatoria de subvencións destinadas á realización de programas de interese xeral con fins sociais, con cargo á asignación tributaria do 0,7% do Imposto sobre a Renda das Persoas Físicas e do Imposto de Sociedades correspondente ao ano 2025.
