O arcebispo de Santiago presidiu a Eucaristía na celebración da memoria da Virxe de Lurdes, Xornada Mundial do Enfermo

Este mércores 11 de febreiro, ás 19:00 horas, o arcebispo de Santiago de Compostela, monseñor Francisco José Prieto Fernández, presidiu a Eucaristía na igrexa de San Xurxo, na Coruña. No marco da Hospitalidade de Lourdes e da Xornada Mundial do Enfermo, destacouse o valor do servizo próximo e do apoio a quen sofre.

Na súa homilía, o arcebispo reflexionou sobre a parábola do bo samaritano, proclamada no Evanxeo de san Lucas, e presentouna como un espello da vida cristiá. Así, utilizou o camiño de Xerusalén a Jericó como metáfora do camiño da vida, no que cada persoa debe decidir entre pasar de longo ou deterse ante o sufrimento alleo.

Monseñor Prieto subliñou que o samaritano non se limitou a compadecerse, senón que se achegou ao ferido, tocou as súas feridas, coidouno e asumiu mesmo os gastos que a súa atención puidese xerar. “Este modo de actuar representa o modelo do amor cristián”, afirmou, sinalando que a verdadeira fe tradúcese en xestos concretos de coidado e acompañamento.

O arcebispo lembrou ademais as palabras finais de Xesús na parábola: “Vai e fai ti o mesmo”, como un envío directo a vivir a caridade na vida cotiá. E vinculou este ensino co xesto do lavatorio dos pés e coa Eucaristía, entendida como escola de fraternidade e servizo.

Durante a celebración, monseñor Prieto animou a recoñecer a Cristo tanto no enfermo como en quen o coida, destacando que nese encontro faise visible o amor de Deus.

A celebración de hoxe enmárcase na XXXIV Xornada Mundial do Enfermo, instituida por san Xoán Paulo II en 1992 e que este ano ten como lema: “A compaixón do samaritano: amar levando a dor do outro”, proposta polo papa León XIV.

A Xornada Diocesana do Enfermo celebrarase este venres ás 20:00 horas na parroquia de Santo Antonio da Coruña, con misa presidida polo arcebispo e oración especial por enfermos, familias e profesionais sanitarios.