Español
Galego
- Mons. Francisco José Prieto presentou as principais liñas da programación e animou ao mundo empresarial a participar nun proxecto que definiu como patrimonio compartido e oportunidade para Galicia.
O arcebispo de Santiago de Compostela, mons. Francisco José Prieto Fernández, presentou a empresarios e representantes do ámbito económico as principais liñas da programación que a Igrexa compostelá prepara para o Ano Santo 2027. O encontro celebrouse onte, luns, durante un almorzo no Salón dos Peregrinos da Hospedería de San Martiño Pinario.
No acto participaron o presidente da Confederación de Empresarios de Galicia (CEG), Juan Vieites; o xerente do Xacobeo 2027, Antonio Casas; o ecónomo diocesano, Fernando Barros; membros da Comisión do Ano Santo 2027 e numerosos empresarios convocados pola CEG.
Un patrimonio que pertence a toda a sociedade.
O arcebispo comezou agradecendo a presenza dos asistentes e explicou que o Ano Santo Compostelán, aínda que afunde as súas raíces na tradición cristiá, chegou a converterse co paso dos séculos en “un patrimonio compartido”, capaz de reunir a persoas de distintas procedencias, culturas e sensibilidades.
Referiuse tamén ás distintas razóns que levan a emprender o Camiño. Mentres algunhas persoas peregrinan movidas pola fe, outras buscan respostas, silencio, encontro ou un tempo diferente nas súas vidas. Todas elas contribuíron a configurar unha experiencia que comeza como percorrido xeográfico e histórico e termina converténdose, con frecuencia, nun camiño interior.
O pelado lembrou que a tradición xacobea atravesou momentos difíciles durante o século XX e destacou a figura de Elías Valiña, párroco do Cebreiro e comisario do Ano Santo de 1982. As súas frechas amarelas permitiron recuperar roteiros que comezaban a perderse e volveron sinalar Compostela como destino para miles de peregrinos.
A esta recuperación sumouse posteriormente o apoio das institucións públicas, especialmente da Xunta de Galicia a partir dos anos noventa. Esta colaboración fixo posible que a celebración relixiosa estivese acompañada polo Xacobeo e por unha ampla programación cultural, social e turística. “Os grandes acontecementos só alcanzan toda a súa capacidade transformadora cando moitas vontades diferentes saben atoparse ao redor dun proxecto común”, afirmou o arcebispo.
Unha invitación para formar parte do proxecto.
Mons. Francisco Prieto sinalou que o Ano Santo e o Xacobeo situaron á cidade Compostela e a Galicia no mundo, pero tamén vincularon esta terra con valores como a acollida, o encontro, o esforzo, a hospitalidade, a procura e a esperanza.
Desde esta perspectiva, explicou que a Igrexa compostelá desexa vivir o Ano Santo 2027 con vontade de participación, sumando esforzos entre institucións, sociedade civil e empresas.
O arcebispo explicou que patrocinar a programación pode representar moito máis que asociar unha empresa a un acontecemento cunha ampla proxección. Supón contribuír a conservar un patrimonio recibido durante séculos, promover a cultura e a beleza, mellorar a atención aos peregrinos e vincular a responsabilidade social das empresas cunha celebración que proxecta Galicia e España en todo o mundo.
Tamén puxo en valor a achega social do tecido empresarial, que, alén de crear emprego e riqueza, xera innovación, relacións, cultura empresarial e compromiso co territorio. Por este motivo, animou a cada empresa para exporse que pode achegar, desde a súa propia identidade, capacidade e creatividade, para que o Ano Santo deixe unha pegada duradeira.
Patrimonio, música e espazos de reflexión.
Entre as liñas de traballo presentadas figura a renovación do Museo Diocesano e a creación do espazo expositivo “Orixes” no mosteiro de Santo Martín Pinario. O proxecto inclúe tamén a musealización dos corredores e a configuración de “Compostela “, unha exposición permanente destinada a achegar a peregrinos e visitantes o patrimonio relixioso e cultural de Santiago.
A programación concederá así mesmo unha presenza relevante á música. Está prevista a composición do Himno do Ano Santo, a celebración dun gran concerto conmemorativo e a organización de concertos de música sacra e clásica en distintos templos. Tamén se programarán actuacións de Abraham Cupeiro, músico e musicólogo especializado na recuperación de instrumentos antigos, e concertos en igrexas situadas ao longo do Camino.
O arcebispo referiuse tamén ao diálogo entre a Igrexa e o mundo empresarial, que se articulará mediante dous grandes encontros. O primeiro celebrarase en 2026 e terá como eixo de reflexión “A civilización occidental”. O segundo, previsto para 2027, estará dedicado a “Os Camiños” e reunirá algunhas dos principais roteiros de peregrinación, tanto de tradición católica como doutras culturas. Será unha oportunidade para reflexionar sobre o papel que estes camiños desempeñaron na construción dos pobos e sobre o que aínda poden achegar á sociedade actual.
A Porta Santa como invitación a comezar de novo.
A apertura e o peche da Porta Santa enmarcarán a celebración do Ano Santo 2027. Mons. Prieto lembrou o seu profundo significado cristián, pero sinalou que tamén ofrece unha imaxe comprensible para quen se achega desde outras sensibilidades: «Unha porta que se abre, un limiar que invita a poñerse en camiño, a posibilidade de comezar de novo». O arcebispo utilizou esta imaxe para resumir o sentido da convocatoria: “Iso será, en boa medida, o Ano Santo 2027: unha porta aberta”.
A presentación detallada da programación correspondeu ao ecónomo diocesano, Fernando Barros. Pola súa banda, Juan Vieites animou aos empresarios presentes a estudar a súa participación nas diferentes iniciativas, mentres que Antonio Casas explicou os beneficios fiscais previstos legalmente para as empresas patrocinadoras.
“O Ano Santo 2027 aínda está por escribir”, sinalou o arcebispo antes de animar ao mundo empresarial a achegar as súas propias páxinas a unha historia na que a Igrexa e as administracións públicas tamén asumirán as súas respectivas responsabilidades.
