Mons. Julián Barrio recorda que “A paixón do Señor é un misterio de amor”

Este Venres Santo contemplamos a cruz que se alza en cada situación de sufrimento, e vivimos a morte de Xesús desde a fe que nos achega esperanza  porque é signo dun amor que é máis forte que a morte”. Así comezaba hoxe monseñor Julián Barrio a homilía deste Venres Santo. “Ensinar a sufrir é aprender a vivir. Talvez a cruz fira a nosa sensibilidade acomodada pero forma parte da vida de cada día. Para os cristiáns é forza e sabedoría que nos leva a elixir a intemperie do amor. Onde parece haber só fracaso, derrota e dor, está todo o poder do amor de Deus”, comentou o arcebispo emérito de Santiago na celebración da Paixón do Señor na Catedral compostelá

Monseñor Barrio engadiu que “celebrar a paixón é abrirnos á gran tribulación que hoxe se está vivindo na historia estando de parte dos que sofren e lavando noso vivir no sangue do Año. A paixón do Señor é misterio de amor”.

D. Julián continuou dicindo que “Mirando a Cristo na cruz nada falta: Déunolo todo. Mirando a través dos ollos mesmos de Xesús á humanidade vemos que aínda falta moito: envolvidos nos nosos egoísmos, non estamos a dar todo por El e polos irmáns”. E engadiu que “o home segue sendo un ser doente que debe seguir coa súa cruz a Cristo, e axudar a levar a cruz aos demais: os migrantes, os refuxiados, as persoas maltratadas, os enfermos, os anciáns que viven a soidade, os cristiáns perseguidos e os desesperanzados”.

Terminou a súa homilía pedindo que non dar as costas aos “Ecce homo” dos nosos días: “Deixemos que o Señor asperxe co seu sangue os dinteis da porta deste templo que somos, para que resplandezcamos a través do testemuño e nos vexamos liberados dos nosos inimigos. Acompañemos nesta tarde o silencio e a dor de María, achegándonos a recoller o corpo de Cristo coa saba branca da nosa compaixón para que un día tamén nós vexámonos envolvidos na saba branca da súa misericordia á espera do gozo da resurrección”.