Misa Crismal | Monseñor Prieto subliña a alegría de ser pastores segundo o corazón de Deus

  • Os sacerdotes composteláns renovan as súas promesas na Misa Crismal.
  • Mons. Prieto: “Só desde a centralidade en Cristo teremos credibilidade evanxelizadora”.
Esta mañá celebrouse na Catedral de Santiago de Compostela a Misa Crismal, unha cerimonia solemne cuxo nome provén do termo latino chrisma, que significa “unción”. Durante esta celebración, consagráronse o Santo Crisma e os Santos Óleos, que serán empregados nos sacramentos do Bautismo, a Confirmación e a Unción dos enfermos nas parroquias da Diocese ao longo do ano.
A celebración, presidida polo arcebispo de Santiago de Compostela monseñor Francisco José Prieto Fernández, contou coa presenza do arcebispo emérito, monseñor Julián Barrio, ademais de membros do cabido catedralicio, sacerdotes, diáconos, relixiosos, peregrinos e fieis diocesanos. Durante a celebración, os presbíteros renovaron as súas promesas sacerdotais, reafirmando o seu compromiso con Cristo e a súa vocación ministerial.

Durante a homilía o arcebispo de Santiago reflexionou sobre o sentido profundo do sacerdocio, facendo unha chamada a centrar a vida ministerial en Cristo, cultivar a fraternidade entre presbíteros e vivir con entusiasmo a misión evanxelizadora.
Inspirado nas memorias do Papa emérito Bieito XVI, o prelado compostelán lembrou como o pontífice describía a mirada dos fieis cara aos sacerdotes: “Vían en nós a persoas a quen Cristo confiara unha tarefa para levar a súa presenza entre os homes”. A partir desta imaxe, mons. Prieto subliñou que a credibilidade evanxelizadora non provén de discursos baleiros, senón do testemuño auténtico dos pastores: “Só desde a centralidade en Cristo teremos credibilidade evanxelizadora, porque non se trata de argumentos fáciles, senón da claridade e a forza do testemuño de ser pastores segundo o corazón de Deus.”

O prelado animou aos sacerdotes para renovar a súa mirada cara a Deus e cara á comunidade que serven, lembrando que foron unxidos para anunciar a boa nova. Citando o Congreso de Vocacións celebrado en Madrid, preguntou: “Para quen somos? Somos para Deus, somos para os homes, os nosos irmáns.”

O arcebispo tamén alertou sobre os perigos de caer no desánimo,  no activismo baleiro e o esgotamento pastoral: “Corremos o risco de mostrarnos moi activos e, ao mesmo tempo, sentirnos impotentes (…) de facer prevalecer a magnitude dos problemas sobre a inmensidade de Deus”. Ante isto, animou aos presbíteros a recuperar a memoria agradecida do paso de Deus nas súas vidas e renovar a súa misión evanxelizadora desde a contemplación do amor divino, como fonte de renovación espiritual e vocacional.

Mons. Prieto fixo unha chamada a fortalecer a comuñón entre os sacerdotes e a Diocese, destacando a importancia da fraternidade e o apoio mutuo dentro do presbiterio: “Grazas por fortalecer os vínculos de fraternidade e amizade, por sosternos mutuamente, por coidar os enfermos, por compartir os bens e aprender da sabedoría dos nosos maiores, por saber rir e chorar xuntos.”

Neste sentido, agradeceu o testemuño diario de tantos presbíteros que “coidan do irmán enfermo, comparten os bens, saben rir e chorar xuntos”, e que acollen “con misericordia, sen rigorismos nin laxismos, acompañando no camiño da conversión”.

No contexto do Xubileu de 2025, o arcebispo convidou a vivir a fe como un camiño compartido, animando a afrontar os retos actuais “como peregrinos de esperanza”. “Somos unxidos para ser servidores de Deus e anunciar no corazón da humanidade a boa noticia da liberación e a salvación”, proclamou.

Previous articleNo Domingo de Ramos, monseñor Prieto destaca a importancia de vivir este tempo litúrxico como un camiño espiritual
Next articleCatedral de Santiago de Compostela | Celebracións do Triduo Pascual

RELATED ARTICLESMORE FROM AUTHOR