María Begoña Díaz, nova Delegada de Ensino da Arquidiocese de Santiago de Compostela

A docente de Relixión María Begoña Díaz García será, desde hoxe, a nova Delegada de Ensino da Arquidiocese de Santiago de Compostela, en substitución de Luís Otero Outes, quen desenvolveu este labor durante máis de 25 anos.

A nova Delegada de Ensino valorou como un gran reto o que este nomeamento supón tanto no profesional como no laboral, e que compaxinará co seu labor como docente de Relixión no IES de Milladoiro en Ames. Begoña Díaz, ilusionada, asume a gran responsabilidade de seguir traballando da man do profesorado de Relixión, que na Diocese realiza unha indispensable tarefa na formación relixiosa, intelectual e humana do alumnado que elixe esta materia.

Nada en Ferrol, Díaz García, casada e nai de tres fillos, é Licenciada en Ciencias Químicas pola USC e graduada en Ciencias Relixiosas polo Instituto Teolóxico Compostelán. A súa experiencia como docente desenvolveuse nos últimos anos no IES Poeta Díaz Castro (Guitiriz-Lugo), IES Río Miño (Rábade-Lugo), IES As Insuas (Muros), IES A Guía (Vigo), IES Castelao (Vigo), IES Alexandre Bóveda (Vigo), IES Universidade Laboral (Ourense), IES Otero Pedrayo (Ourense) etc.