D. Julián reuníuse cos novos responsables rexionais de Equipos de Nosa Señora

O pasado venres día do 30 de setembro, o arcebispo de Santiago, monseñor Julián Barrio, reuniuse no Arcebispado compostelán cos novos responsables rexionais de Equipos da nosa Señora (ENS), María Ascensión Castaño Lorenzo e Jesús García Buján, a quen acompañaba os responsables do Sector da Coruña, Raquel Ferreiro Álamo e Julián Ferrer García.

Os novos responsables rexionais, María Ascensión Castaño Lorenzo e Jesús García Buján, quen tamén estaban acompañados polo novo consiliario rexional, Juan Antonio Testón Turiel, tiveron ocasión de charlar co arcebispo sobre os obxectivos de Equipos da nosa Señora para o curso que se iniciará en breve para todos os matrimonios pertencentes a este movemento de espiritualidade conxugal.

No Sector da Coruña, a apertura oficial do curso 2022/2023 realizarase o próximo día 12 de outubro na Coruña, na Parroquia da nosa Señora dos Rosales, a partir das 11:45 h. comezando coa acollida de todos os participantes.

Os Equipos da nosa Señora son un movemento conxugal, dirixido e coordinado por matrimonios que se organizan en grupos chamados equipos integrados por 4 ou 6 parellas, acompañadas por un sacerdote consiliario. Os ENS naceron no París da II Guerra Mundial e na postguerra constituíronse en movemento aprobando a Carta Fundacional en 1948. O seu promotor, o Padre Henri Caffarel, preguntado por algúns novos matrimonios sobre como poderían ir máis aló nas súas promesas bautismais e que os podería axudar a vivir a fe en parella, elaborou un método que favorecía a comunicación no matrimonio en profundidade e á luz de Cristo. É así como a Espiritualidade Conxugal, nomeábase por primeira vez na historia da Igrexa e constituíase no carisma fundamental deste movemento.

Os ENS están pensados para dar resposta a todos aqueles matrimonios que busquen ser felices seguindo a Cristo xuntos e buscando cumprir a súa vontade. Chámanse “equipos” porque teñen un obxectivo común, que é axudarse mutuamente no progreso espiritual e humano; coñecer mellor a Deus, atopalo na oración, axudarse mutuamente, estudar xuntos e orar os uns polos outros. E póñense baixo o patrocinio de “A nosa Señora” porque é María a que os axuda a achegarse a Xesucristo, quen é o centro da vida espiritual dos membros dos ENS.

Galicia é unha das nove rexións en que se distribúe a Superrexión de España. Na actualidade hai equipos agrupados en 4 sectores localizados na Coruña-Santiago, Lugo-Lalín, Ourense e Vigo-Pontevedra. ENS está presente en todo o mundo a través duns once mil equipos.