Máis de sesenta axentes de pastoral familiar participan esta fin de semana no VI Encontro de Formación organizado polas delegacións episcopais para a Familia e a Defensa da Vida de Galicia, baixo o lema «Matrimonio e familia: poñamos os pés na terra». Entre os asistentes atópanse os delegados de Pastoral Familiar da Arquidiocese de Santiago de Compostela, Ana Robles González e Antonio Gutiérrez González.
Os participantes están a ter a oportunidade de reflexionar sobre os retos e as dificultades que se atopan os matrimonios e as familias nunha sociedade que, en boa medida, prioriza a inmediatez e o temor ao compromiso.
Na sesión matinal do sábado, a mediadora e directora do Instituto Coincidir, Mercedes Honrubia, proporcionou pistas e exemplos prácticos para acompañar os matrimonios en dificultades. Fixo especial fincapé nos elementos que debe ter o proxecto en común que cada matrimonio ha de elaborar desde o momento en que se dan un si definitivo e comezan unha historia xuntos. Honrubia presentou os aspectos máis característicos das crises que vive toda persoa (evolutivas, externas, internas e a fatídica morte súbita, que é o momento en que un dos membros do matrimonio anuncia que dá por rota a relación sen existir un aviso previo). Comparou o matrimonio a un equipo de rugby e destacou que nel deben prevalecer os valores da humildade, o respecto mutuo, a superación das dificultades e o compromiso. Para rematar, resumiu as claves do éxito matrimonial en cinco “c”: comunicación veraz e honesta, confianza para falar de todo, coordinación dos valores e fortalezas de cada un, complementariedade e compromiso.
Pola tarde a psicopedagoga e asesora familiar Blanca Elía, presidente da asociación Dálle unha Volta, analizou o dano psicolóxico e afectivo que está a provocar a adicción ao porno en nenos, mozos e adultos. Avogou por unha sexualidade sa e respectuosa coa dignidade das persoas. Para iso aposta por darlle á sexualidade un enfoque positivo, ofrecéndolle aos nenos e mozos unha información completa sobre todas as súas dimensións (afectiva, relacional, psicolóxica, espiritual). Presentou os sinais de alarma para detectar cando unha persoa é adicta ao porno e desenvolveu doce “vacinas” contra esta adicción.
A sesión do domingo estará a cargo de expertos do programa de familia e infancia da Cáritas da diocese de Tui-Vigo, que propoñerán un catálogo de boas prácticas para a detección e o acompañamento dos matrimonios en crises. Tamén se prestará atención ao reto que supón integrar as familias migrantes.
As xornadas clausuraranse cunha eucaristía que estará presidida polo bispo de Tui Vigo, mons. Antonio Valín.
