Español
Galego
A Diocese de Santiago de Compostela deu hoxe inicio en Pontevedra ás tradicionais Xornadas Sacerdotais, unha semana clave para a vida pastoral diocesana. O encontro, dirixido ao clero, busca fortalecer a comuñón, renovar a vida espiritual e sentar as bases da acción pastoral dos próximos anos.
A primeira xornada celebrouse hoxe na parroquia de Campañó, e contou xa coa presenza do arcebispo de Santiago de Compostela, mons. Francisco José Prieto Fernández, que quixo acompañar persoalmente os sacerdotes neste inicio.
Estas xornadas enmárcanse no camiño aberto tras a Asemblea Diocesana do pasado 15 de novembro, na que se presentou a Carta Pastoral do arcebispo, documento de referencia para a elaboración do Plan Pastoral 2026-2029.
As Xornadas Sacerdotais desenvolveranse ata o día 23 de xaneiro nas tres grandes vigairías da diocese. Na vigairía de Pontevedra terán lugar os días 19, 20 e 21; na vigairía de Santiago, os días 20, 21 e 22 na Casa de Exercicios; e na vigairía da Coruña, os días 21, 22 e 23 no Fogar de Santa Margarida.
Cada xornada segue un horario común, que comeza ás 10.30 horas coa acollida e un momento de oración, seguido de dúas sesións formativas ao longo da mañá, e conclúe cunha comida compartida ás 14.00 horas.
O programa articúlase en tres grandes eixos. A primeira xornada está dedicada a afondar na vida espiritual e conta coa intervención da irmá María José Tuñón, directora do Secretariado da Comisión Episcopal para a Vida Consagrada, que convida a “vivir e promover a Vida no Espírito”. A segunda céntrase na programación pastoral, con orientacións do Consello Diocesano de Pastoral para o traballo coordinado dos próximos anos. A terceira estará dedicada a información e cuestións de actualidade diocesana.
As Xornadas Sacerdotais preséntanse así como un primeiro gran fito no camiño cara ao novo Plan Pastoral, que orientará a vida da diocese no horizonte 2026-2029.
