Español
Galego
- Monseñor Prieto: “Toda persoa ten dereito a vivir baixo un teito”
A iniciativa enmárcase no programa “Acompáñote”
O arcebispo de Santiago, monseñor Francisco José Prieto Fernández, presidiu o acto inaugural e procedeu a bendicir a terceira das vivendas destinada a maiores que puxo en funcionamento Caritas Diocesana de Santiago-Interparroquial da Coruña .Nesta ocasión trátase da vivenda de Santiago do Burgo, grazas á doazón feita pola Construtora Benéfica Sagrada Familia.
Dispoñer dun fogar
Nas súas primeiras palabras o prelado lembrou que asistiamos a un acto que procede desde a xenerosidade, a solidariedade e a fraternidade porque “toda persoa ten dereito a vivir baixo un teito”. Falou da importancia de ter unhas instalacións destas características para que “gozar dunha tranquilidade e a mellor das convivencias para que deste xeito poidades seguir facendo proxectos e realidades”.
Monseñor Prieto sinalou a importancia de dispoñer dunha casa, dunha vivenda “que se transforma nun fogar”, mencionando que en proxectos como este sempre estará presente a Igrexa e Cáritas para “acoller as persoas que nos demandan axuda”. Agradeceu a todo o mundo que fixo posible poñer en marcha esta vivenda “que brota do esforzo e do traballo diario que levades a cabo para axudar aos máis necesitados”. As novas instalacións contan con 7 prazas e todas as comodidades e accesibilidade para ser o fogar de quen o precise.
Ao acto asistiron representantes das Cáritas diocesana, interparroquial e parroquial, e da empresa que cedeu a vivenda e se encargou da súa preparación e posta en funcionamento.
Programa para maiores
Caritas Diocesana de Santiago-Interparroquial da Coruña, desde hai seis anos leva a cabo un programa de Atención a Persoas maiores en situación de soidade ou vulnerabilidade denominado «Acompañote”. O programa axudou a máis de 600 persoas, tendo mensualmente en activo a máis de 300 maiores na cidade que necesitan un apoio no seu día a día, xa sexa para acompañamento a citas médicas, visitas, paseos, solución de trámites administrativos, préstamos gratuítos de produtos de apoio, ou simplemente pola necesidade dunha voz amiga que os/as chame, comente e se interese por eles/as telefonicamente todas as semanas.
A este programa hai que sumar a incorporación de tres vivendas de acollida destinadas a persoas maiores, autónomas, que polos seus ingresos, situación socio familiar ou vulnerabilidade, non poden facer fronte a un alugueiro ou non teñen familia que os poida acoller. Con este novo piso, Caritas Interparroquial da Coruña dispón de 23 prazas para persoas maiores autónomas en situación de necesidade.
