Arroupa Moda Re-, a empresa de inserción impulsada por Cáritas Diocesana de Santiago de Compostela, inaugurou hoxe a súa nova tenda na rúa Castelao, en pleno corazón comercial de Vilagarcía de Arousa. A apertura coincide co décimo aniversario de Arroupa Moda Re-, un proxecto que transformou o modo de xestionar o residuo téxtil en Galicia e que converteu a moda sostible nunha oportunidade de emprego, de dignidade e de coidado do medio ambiente.
O acto oficial de inauguración contou coa participación do arcebispo de Santiago de Compostela, do presidente de Cáritas Española, da directora de Cáritas Diocesana de Santiago, da directora xeral de Moda Re- en España, así como de representantes da Xunta de Galicia, a Deputación e o Concello de Vilagarcía. Coa súa presenza, as institucións quixeron apoiar un modelo que une inclusión social, sustentabilidade e compromiso comunitario.
A nova tenda de Vilagarcía ofrece moda sostible e solidaria con roupa, calzado e complementos para todas as idades, aos que se suman tamén oportunidades de colaboración co tecido local. Ademais da súa función comercial, o establecemento será un recurso social ao servizo de Cáritas, xa que permitirá que as persoas acompañadas pola entidade accedan a roupa a través de vales gratuítos de compra en formato QR, garantindo así un acceso digno e normalizado, sen estigmas nin distincións fronte ao resto da clientela.
O 100% DOS INGRESOS REINVÍSTESE EN EMPREGOO modelo de funcionamento de Arroupa Moda Re- distínguese polo seu carácter solidario, transparente e sostible. A roupa que chega ás súas tendas procede exclusivamente de doazóns cidadás recollidas en contedores autorizados e é clasificada na planta propia da entidade, garantindo en todo momento a rastrexabilidade do proceso.
A diferenza doutros esquemas de xestión, en Arroupa o 100 % dos ingresos obtidos reinvístese en emprego inclusivo e en programas sociais de Cáritas, reforzando así o seu compromiso coas persoas en situación de vulnerabilidade. Este enfoque permite, ademais, xerar sinerxias positivas coa actividade comercial local. En Vilagarcía, por exemplo, a tenda colabora cunha modista da zona, á que se deriva a quen necesita arranxos nas pezas adquiridas.
Durante o acto de inauguración, o arcebispo de Santiago, monseñor Francisco José Prieto, sinalou que “a apertura desta tenda en Vilagarcía é un signo de esperanza, porque mostra que é posible coidar das persoas e, ao mesmo tempo, ofrecer dignidade e futuro a quen máis o necesitan”.
O presidente de Cáritas Española, Manuel Bretón, destacou que “Arroupa é un exemplo de innovación social que inspira a toda a rede de Cáritas. Aquí, a economía circular convértese en economía de esperanza, porque transforma residuos en oportunidades reais de vida para as persoas”.
Pola súa banda, a directora de Cáritas Diocesana de Santiago, Pilar Farjas, subliñou que “cada peza que chega a Arroupa convértese nunha oportunidade de dignidade. Demostramos en dez anos que as doazóns poden transformarse en emprego, en consumo responsable e nunha sociedade máis xusta”.
A directora xeral de Moda Re- en España, Noema Paniagua, concluíu afirmando que “Arroupa foi pioneira en Galicia en innovación, rastrexabilidade e dignificación do acceso á moda sostible. A apertura de Vilagarcía reforza o traballo de toda a rede nacional e demostra que a economía social ten futuro”. 
DEZ ANOS DE INSERCIÓN LABORAL CON ÉXITO
A apertura desta tenda en Vilagarcía coincide cunha data especial xa que Arroupa Moda Re- cumpre dez anos de traxectoria desde que iniciou a súa andaina en 2015 como a primeira empresa de inserción téxtil de Cáritas en Galicia. Neste tempo, a entidade pasou de contar con 7 persoas en persoal nos seus inicios para empregar na actualidade a 36 traballadores, dos cales 29 teñen contrato de inserción. En total, 128 persoas en situación de vulnerabilidade tiveron unha oportunidade laboral en Arroupa, recibindo acompañamento e formación para dar o salto ao mercado ordinario de traballo.
O impacto ambiental foi igualmente decisivo. Nunha década, tratáronse máis de dez millóns de quilos de roupa usada, fomentando a reutilización e a reciclaxe e evitando que toneladas de residuo téxtil acaben en entulleiras incontroladas. Grazas a este labor, logrouse evitar a emisión de 46.000 toneladas de CO₂ e aforrar 6.400 millóns de litros de auga, reducindo de maneira significativa a pegada ambiental do sector téxtil en Galicia.
No plano institucional, Arroupa consolidou o seu papel como socio estratéxico dos concellos, con dúas licitacións de catro anos consecutivos en Santiago de Compostela. En 2023 incorporáronse os oito concellos do Consorcio As Mariñas na provincia da Coruña, que supuxeron 75 novos puntos de recollida, ademais das licitacións de Curtis e Vilaboa.
Hoxe a rede conta con 360 contedores, 252 instalados vía licitacións e convenios con 46 administracións públicas locais, destacando os 32 contedores que actualmente se xestionan a través da colaboración co Concello de Vilagarcía de Arousa. Actualmente, Arroupa Moda Re- presenza nun total en 60 municipios, tendo en cuenta as
O traballo desenvolvido por Arroupa recibiu un crecente respaldo externo. A entidade foi distinguida co Premio Solidarios 2025 do Grupo ONCE e conta con certificacións internacionais como as normas ISO 9001 e ISO 14001. Ademais, está inscrita como xestor autorizado de residuos na Consellería de Medio Ambiente, rexistrou a súa pegada de carbono no Ministerio para a Transición Ecolóxica e conta na súa memoria anual de sustentabilidade con plan específico de descarbonización.
Na súa primeira década de traxectoria, Arroupa apostou tamén pola innovación nos procesos. Todos os contedores están equipados con sensores volumétricos, unha tecnoloxía que permite optimizar os roteiros de recollida e reducir o impacto ambiental. Así mesmo, desenvolveuse un aplicativo web para o Programa de Entrega Social, que facilita ás familias o acceso á compra dignificada mediante vales gratuítos mediante código QR.
En paralelo, a rede de tendas de Arroupa foise expandindo de forma estratéxica naquelas localidades con maior necesidade de cobertura social. Aos establecementos de Santiago, Pontevedra, A Coruña e Carballo sumouse recentemente a apertura dunha nova tenda en Vilagarcía de Arousa.
En definitiva, Arroupa transformou a xestión do residuo téxtil en Galicia nunha experiencia de inserción laboral, dignidade social e sustentabilidade ambiental, consolidándose como un referente dentro da rede Moda Re- e na economía social española.
