Español
Galego
Cáritas Diocesana de Santiago pecha así a súa Campaña de Nadal 2025 axudando a que 1.336 nenos e nenas de 637 familias esperten o día de Reyes con algún agasallo esperándoos. Detrás de cada paquete houbo persoas concretas que pensaron neles, que preguntaron que lles gustaba, que envolveron con mimo e que fixeron posible que esa mañá fóra, polo menos por unhas horas, como a de calquera outra familia.
Na Coruña, máis de 900 menores de máis de 400 familias recibirán os seus agasallos. En Santiago serán 350 nenos e nenas de 180 familias e en Pontevedra e Arousa, 86 menores de 57 familias. Para moitos deles non se trataba só dun xoguete, senón de sentirse iguais, de non quedar á marxe dunha tradición que se vive intensamente na infancia.
Durante semanas, os paxes de Cáritas Diocesana, repartidos entre o voluntariado, entidades colaboradoras e persoas anónimas, traballaron con discreción para que a maxia chegase a tempo coa certeza de que un xesto sinxelo pode marcar unha diferenza enorme.
O equipo de Cáritas Diocesana de Santiago sinala que “a maxia dos Reis Magos segue viva cando hai persoas dispostas a coidala. Cada agasallo é unha maneira de dicirlle a un neno que non está só e que alguén pensou nel con agarimo. Esa é a verdadeira maxia que fai posible a noite de Reis”
Esta iniciativa pon o broche final á Campaña de Nadal 2025, coa que Cáritas na diocese de Santiago quixo lembrar que “vivir con dignidade non debería ser cuestión de sorte. O Nadal termina, pero as dificultades de moitas familias continúan, e por iso o acompañamento de Cáritas segue presente durante todo o ano”.
Desde a entidade agradécese “ profundamente a todas as persoas que fixeron posible esta cadea de ilu sión e anímase a seguir sendo paxes da esperanza máis aló das festas, porque hai moitas mañás do ano nas que un pequeno xesto pode cambialo todo”.
