Español
Galego
- Será destinada á acollida temporal de personas e familias necesitadas
A xestión do inmoble vai levala a cabo a entidade social
Por medio dun convenio de colaboración o Arcebispado de Santiago cede a Cáritas a casa reitoral e unha horta na localidade da Illa de Arousa que será destinada a vivenda de acollida temporal de persoas e familias necesitadas. Asinaron o acordo José Fernando Barros Fornos en representación do Arcebispado na súa condición de Ecónomo da Diocese de Santiago, e Pilar Farjas Abadía como directoras de Cáritas Diocesana de Santiago de Compostela. No acto estiveron presentes David Álvarez e Mar Viqueira, consiliario e directora de Cáritas Interparroquial de Arousa, respectivamente.
Actuacións
Corresponde a Cáritas a execución das obras de adecuación necesarias para que o inmoble poida ser destinado á finalidade prevista no presente convenio. A xestión do inmoble vai levala a cabo a entidade social que non poderá encomendala ou cedela a un terceiro se non é co consentimento previo e por escrito do Arcebispado. Todos os gastos derivados da utilización dos inmobles serán a cargo de Cáritas, así como os da súa conservación, e mantemento, e as reparacións ou as modificacións que houbese que realizar por obrigación legal ou das compañías subministradoras de enerxía ou servizos.
Igualmente Cáritas comprométese con todas as obrigacións que se impoñen a nivel laboral respecto dos traballadores, ou no seu caso, voluntarios que presten os seus servizos nos inmobles cedidos en virtude do presente convenio
O presente convenio estenderá a súa vixencia ata o 31 de decembro de 2026, prorrogándose automaticamente, unha vez alcanzada a duración inicial, por anualidades sucesivas, salvo denuncia expresa por escrito de calquera das partes con polo menos dous meses de antelación á data en que se cumpra cada anualidade.
