Encontro do arcebispo de Santiago coa Fundación Fogar de Santa Margarida

Na tarde deste luns, a Fundación Fogar de Santa Margarida celebrou un encontro presidido polo arcebispo de Santiago de Compostela, monseñor Francisco José Prieto Fernández, acompañado polos demais membros do Padroado da institución. A xornada reuniu a todo o persoal do centro nun ambiente de fraternidade, reflexión e compromiso renovado coa misión educativa e pastoral que desenvolve a entidade.

O acto deu comezo coa celebración da Eucaristía, un momento central da xornada que serviu para unir en oración aos traballadores e directivos da Fundación. Durante a homilía, monseñor Prieto Fernández fixo seu o lema escollido polo centro para o presente curso académico: “Igrexa = Fogar para todos”, unha expresión que, segundo destacou, resume a esencia da tarefa evanxelizadora e educativa que a institución leva adiante cada día.

O arcebispo animou aos asistentes para vivir o seu traballo como unha auténtica vocación ao servizo dos demais, lembrándolles que “cada xesto educativo e cada acción de acompañamento é tamén unha forma de anunciar o Evanxeo”. Así mesmo, subliñou a importancia de manter un espírito de comunidade, de acollida e de apertura a todas as realidades humanas que conflúen no Fogar de Santa Margarida.

Tras a Eucaristía, o teólogo e profesor José Ramón Amor Pan tomou a palabra para presentar a nova Fundación Educativa Diocesana, un proxecto que busca fortalecer e coordinar o labor dos centros educativos diocesanos baixo una mesma identidade e misión pastoral. Amor Pan explicou os obxectivos desta iniciativa, que pretende potenciar a calidade educativa, reforzar a identidade cristiá dos colexios e favorecer unha maior cooperación entre as distintas institucións diocesanas.

A xornada concluíu cun encontro fraternal no comedor do centro, onde os participantes puideron compartir un momento máis distendido. Entre conversacións e sorrisos, respirouse un ambiente de proximidade e pertenza, reflexo do espírito familiar que caracteriza á Fundación Fogar de Santa Margarida desde as súas orixes.

Con este encontro, a Fundación renovou o seu compromiso de seguir sendo un espazo de acollida, educación e esperanza, fiel ao seu carisma e en sintonía coa mensaxe do arcebispo, quen lembrou que a Iglesia está chamada a ser, sempre e para todos, un verdadeiro fogar.