Confirmacións na Parroquia de San Caetano

A parroquia de San Caetano, en Santiago de Compostela, acolleu hoxe sábado 22 de novembro a celebración do sacramento da Confirmación, presidida polo arcebispo de Santiago, monseñor Francisco José Prieto Fernández. Un nutrido grupo de mocidade culminou así a súa iniciación cristiá nunha cerimonia marcada por unha mensaxe centrada na liberdade, o compromiso e a esperanza.

Durante a homilía, o arcebispo lembrou aos confirmandos que a fe “non conclúe, senón que se culmina”, subliñando que o don recibido debía ser asumido en primeira persoa e non vivido como un trámite.

Mons. Prieto alentou a mocidade para vivir a súa fe con liberdade e sen deixarse levar pola indiferenza, animándoos a non ocultar as súas conviccións nun mundo que a miúdo empuxa á superficialidade. Destacou que “Deus non se cansa nunca” das persoas e que o Espírito Santo sería a súa fortaleza no medio das dúbidas, desafíos e fraxilidades propias da vida.