Español
Galego
A cidade eterna xa acolle aos mozos da Arquidiocese de Santiago, que culminaron a súa peregrinación tras días de roteiro, oración e encontro. A xornada deste venres estivo marcada pola emoción contida e a alegría desbordada de chegar, ao fin, ao corazón do cristianismo.
A mañá comezaba cun acto de gran simbolismo na Basílica de Santa María en Trastévere. Alí, unha pequena representación da Arquidiocese, xunto ao arcebispo don Francisco José Prieto Fernández, participou na lectura dun manifesto sobre o eixo espiritual Roma–Santiago–Xerusalén. Tratouse da presentación dun itinerario formativo para mozos que arrinca este ano e que mira ao horizonte de 2033, data na que se prevé un xubileu extraordinario con motivo dos 2.000 anos da redención. Aínda que o groso do grupo aínda se atopaba en camiño, este acto foi unha primeira semente de futuro sementada en chan romano.
Pola tarde, xa sen contratempos, os autocares chegaron finalmente a Roma. E con eles, os rostros cansos pero radiantes dos peregrinos que, tras atravesar Francia e Italia, poñían por fin os pés na praza de San Pedro. O momento foi tan esperado como conmovedor. Alí, miles de mozos españois reuníronse para celebrar xuntos a Eucaristía presidida por monseñor Luis Argüello, presidente da Conferencia Episcopal Española. Unha misa multitudinaria e histórica: só mocidade de España, no corazón da cristiandade.
A emoción foi a linguaxe común. Moitos dos mozos galegos comentaban entre bágoas e sorrisos o que significaba para eles estar alí, compartir a fe nese espazo tan universal e tan íntimo á vez. Era, para moitos, un soño cumprido, o broche perfecto a días intensos de camiño e crecemento interior.
Hoxe, a peregrinación continúa dentro da mesma Roma. O grupo poñerá rumbo a Tor Vergata, onde se celebrará a vixilia e, ao día seguinte, a gran misa co papa León XIV. Outro fito espéralles, pero xa coa certeza de que chegaron onde debían chegar: ao encontro, á comunidade, á fe vivida e compartida.
