O equipo da Delegación para a Mocidade e a Infancia e responsables da Conferencia Episcopal Española reuníronse este mércores, 21 de outubro en Santiago de Compostela, para avanzar nos preparativos da Peregrinación Europea da Mocidade (PEJ) de 2027. A xornada incluíu un encontro co arcebispo, monseñor Francisco José Prieto Fernández.
Na reunión participaron Javier García Rodríguez, delegado diocesano para a Mocidade e a Infancia, e varios colaboradores da delegación, xunto a Francisco Ramírez Mora, director do secretariado da Subcomisión Episcopal para a Mocidade e a Infancia da Conferencia Episcopal Española, e o sacerdote José Benito Gallego Marchante, director do Servizo de Pastoral Vocacional da CEE.
A reunión forma parte do traballo conxunto da Arquidiocese e a Conferencia Episcopal para organizar un encontro que volverá situar a Santiago de Compostela como lugar de peregrinación e encontro para a mocidade de distintos países europeos.
A PEJ celebrarase do 15 ao 18 de xullo de 2027, no marco do Ano Santo Compostelán. A convocatoria está dirixida a mocidade de entre 16 e 35 anos procedentes de parroquias, colexios, movementos, asociacións, irmandades, confrarías e comunidades relixiosas.
A PEJ será unha das citas máis importantes deste curso para a Delegación de Infancia e Mocidade. Alén de participar na peregrinación, os mozos da diocese serán invitados a colaborar como voluntarios na acollida de quen chegue a Santiago.
