Sampedromezoncitas: un campamento onde a diferenza se abraza e o Evanxeo cobra vida en cada mirada

O pasado mércores 23 de xullo, o campamento parroquial “Sampedromezoncitas” recibiu unha visita especial. Ata o corazón do seu campamento, situado na parroquia de Cespón, chegou o arcebispo de Santiago de Compostela, monseñor Francisco José Prieto Fernández, para compartir unha xornada cos 25 nenos, nenas e mocidade que participan nesta edición XLII, xunto aos seus monitores, sacerdotes e cociñeiros.
Á súa chegada, o arcebispo foi recibido coa calidez de quen sente en casa. Os campistas, de idades que oscilan entre os 8 e os 21 anos e procedentes na súa maioría da parroquia de San Pedro de Mezonzo (A Coruña) e de localidades como Pantiñobre, Brandeso, Branzá, Turces ou Viñós, mostráronlle as súas tendas de campaña, conversaron con el sobre as súas inquietudes e compartiron un xantar que deixou un sabor a mar e a encontro nos seus padais.
Neste campamento, a amizade, a unión, a diferenza, a comunidade, a natureza, o coidado do grupo, o servizo, a responsabilidade e a alegría marcan o camiño dun compromiso persoal e social no que, aos poucos, vaise desvelando o rostro de Xesús entre eles. Alí apréndese a convivir e acollerse tal como son: con realidades culturais dispares, con limitacións físicas de fala e oído, desde a zona rural e a cidade, máis crentes e menos, mesmo doutras relixións. Porque cada vida é benvida e cada persoa ten o seu lugar.

Sen móbiles e sen reloxo, pero con moita alegría e ritmo, os días transcorren entre xogos, cantos e oracións. A visita de monseñor Prieto quedou inmortalizada nunha foto de familia, reflexo dun campamento que testemuña que convivir de maneira sinxela e afable uns con outros é posible; que unidos na celebración dominical da Eucaristía cos veciños de Cespón son, xuntos, o rostro dunha comunidade viva en Cristo.

Esta edición número 42 do campamento parroquial pon un broche de ouro ao curso con quince días que, como eles mesmos din, son “molones”, deixando pegada sen pisar a ninguén. A xornada co arcebispo queda xa institucionalizada como “a quedada con D. Francisco”, mentres se preparan para a acollida de familias o Día do Apóstolo e para todo o que resta ata o 31 de xullo, cando regresarán ás súas casas co corazón cheo de historias.

Previous articleA Oficina de Acollida ao Peregrino conta desde hoxe cunha escultura de Homeless Jesus
Next articleReunión dos bispos da Provincia Eclesiástica de Santiago

RELATED ARTICLESMORE FROM AUTHOR