A campaña de emerxencia de Cáritas Diocesana de Santiago para Venezuela supera os 70.000 euros nos seus primeiros 10 días

Cáritas Diocesana de Santiago recadou directamente nas súas contas 70.768,76 euros desde a posta en marcha da campaña extraordinaria de solidariedade con Venezuela promovida por Cáritas Española tras os terremotos que afectaron gravemente o país. Nesta cifra non se inclúen as doazóns realizadas directamente ás contas de Cáritas Española destinadas á emerxencia de Venezuela, moitas das cales proceden tamén da difusión e sensibilización desenvolvidas a través desta campaña. A acción foi activada en resposta á petición de apoio realizada por Cáritas Venezuela e forma parte da actuación coordinada da rede internacional Cáritas para atender as necesidades máis urxentes da poboación damnificada.

As achegas recibidas ata a data proceden de particulares, colectas parroquiais, empresas e arcebispado entre outras iniciativas desenvolvidas no ámbito da Arquidiocese de Santiago de Compostela. O importe recadado será transferido a Cáritas Española para a súa xestión dentro da resposta humanitaria despregada no país.

O presidente de Cáritas Diocesana e arcebispo de Santiago, Francisco José Prieto Fernández, destaca que «a solidariedade demostrada por parroquias, comunidades relixiosas, empresas e particulares volve poñer de manifesto o compromiso da nosa sociedade con quen atravesa situacións de especial vulnerabilidade».

Desde a entidade sublíñase que a cantidade recadada corresponde exclusivamente ás achegas ingresadas directamente nas contas habilitadas por Cáritas Diocesana de Santiago para esta emerxencia.

Ao longo destas semanas, Cáritas Diocesana de Santiago impulsou distintas accións informativas para animar á participación cidadá, entre elas a difusión da campaña a través das súas canles dixitais e redes sociais, como a publicación realizada en Instagram Campaña de apoio a Venezuela.

A campaña continúa aberta

Cáritas Diocesana de Santiago lembra que a emerxencia humanitaria continúa e que a campaña de apoio a Venezuela permanece aberta, polo que as persoas e entidades que desexen colaborar aínda poden realizar as súas achegas.

Os donativos poden efectuarse a través do portal de doazóns de Cáritas Diocesana de Santiago, indicando como destino «Terremoto Venezuela», na seguinte ligazón: Portal de doazóns de Cáritas Diocesana de Santiago.

Tamén se pode colaborar mediante transferencia bancaria nas contas habilitadas directamente por Cáritas Española para esta emerxencia:

Santander: ES23 0049 1892 6927 1329 3362
CaixaBank: ES89 2100 5731 7102 0022 7540 BBVA: ES95 0182 2370 4402 0170 2710 SABADELL: ES87 0081 5240 0300 0349 2752

Cáritas Diocesana de Santiago agradece profundamente a colaboración de todas as persoas, parroquias, comunidades relixiosas, empresas e institucións que contribuíron a esta resposta solidaria, convertendo a axuda e a esperanza nun apoio concreto para as persoas afectadas por esta emerxencia.