O Secretariado de Catequese de Galicia celebra en Ferrol a súa reunión ordinaria e prepara o próximo curso pastoral

O Secretariado de Catequese de Galicia celebrou o pasado venres, 19 de xuño, a súa reunión ordinaria na cidade de Ferro. Unha xornada de traballo conxunto, oración e convivencia entre os responsables da catequese das dioceses galegas.

O encontro estivo presidido polo arcebispo de Santiago de Compostela, mons. Francisco José Prieto Fernández, responsable moderador dos bispos de Galicia neste ámbito pastoral. A reunión contou ademais coa acollida do bispo de Mondoñedo-Ferrol, mons. Fernando García Cadiñanos, quen recibiu aos participantes na cidade departamental.

Ao longo da xornada, os membros do equipo dedicaron tempo á oración, ao intercambio de experiencias e á avaliación das distintas iniciativas desenvolvidas durante o curso. Así mesmo, avanzaron na programación das actividades e liñas de traballo que marcarán o próximo curso de catequese en Galicia.

Alén das sesións de traballo, o encontro tivo un carácter fraterno e de convivencia, favorecendo o diálogo e o fortalecemento dos vínculos entre os responsables diocesanos.

A cita concluíu cunha visita cultural a varias obras do arquitecto modernista ferrolán Rodolfo Ucha, salientable discípulo de Antoni Gaudí, cuxo legado arquitectónico constitúe unha dos principais acenos de identidade patrimonial da cidade.

“Foi un tempo para orar, compartir e planificar o próximo curso”, destacaron os participantes ao termo da xornada, que combinou reflexión pastoral e coñecemento do patrimonio local.