O arcebispo de Santiago abre o ano 2026 cun chamamento á paz e á reconciliación desde a Catedral

  • A solemnidade de Santa María, Nai de Deus, e a 59ª Xornada Mundial da Paz marcaron a primeira gran celebración litúrxica do ano en Compostela, presidida por Mons. Francisco José Prieto Fernández.
Hoxe xoves 1 de xaneiro de 2026, ás doce do mediodía, tivo lugar na Catedral de Santiago a primeira celebración litúrxica do ano, presidida polo arcebispo de Santiago de Compostela, Mons. Francisco José Prieto Fernández. Coincidindo coa solemnidade de Santa María, Nai de Deus, a Eucaristía enmarcouse tamén na 59ª Xornada Mundial da Paz, convocada pola Igrexa universal como inicio do ano civil.
O templo compostelán reuniu a fieis, familias, comunidades relixiosas, sacerdotes concelebrantes e peregrinos de distintas procedencias que quixeron comezar o novo ano aos pés do Apóstolo Santiago, nunha celebración marcada pola oración pola paz e a acción de grazas polo novo ano que comeza.
Na súa homilía, o arcebispo subliñou o significado profundamente simbólico do 1 de xaneiro, día no que a Igrexa mira a María como Nai e eleva a súa súplica pola paz no mundo. Lembrou que o tempo non é só unha sucesión de días, senón “un don e unha tarefa” confiada por Deus, chamada a ser vivida como misión e compromiso. Convidou os presentes a acoller o novo ano como unha bendición e a converterse, á súa vez, en instrumentos de paz e reconciliación na vida cotiá.
Mons. Prieto animou aos fieis para imitar a actitude dos pastores do Evanxeo, que foron “ás carreiras” ao encontro do esencial, poñendo o acento na necesidade de volver ao fundamental: o encontro con Deus. Nese camiño, afirmou, descóbrese a verdadeira paz, non como simple ausencia de conflito, senón como don que nace no corazón e constrúese desde a xustiza e a verdade.

O arcebispo destacou o papel central de María, presentada como Nai que acolle e garda a vida, e como modelo dunha paz que se edifica desde o respecto a toda vida humana, desde o seu inicio ata o seu final. Xunto a ela, evocou a figura silenciosa de san Xosé, exemplo dun compromiso cotián, discreto e fiel, que constrúe a paz sen estridencias.

En referencia á Xornada Mundial da Paz, lembrou a mensaxe do papa León XIV para este ano, titulado “A paz estea con todos vostedes: cara a unha paz desarmada e desarmante”. Seguindo a mensaxe do Santo Padre, o arcebispo insistiu na urxencia de “desarmar” os corazóns da violencia, do medo e dos discursos que xeran confrontación. Neste contexto, chamou a vivir unha “paz desarmada”, visible no Neno de Belén, e unha “paz desarmante”, baseada na escoita, o diálogo e a proximidade desde a verdade.

Na oración pola paz, Mons. Prieto incorporou de maneira especial a mirada aos conflitos do momento presente e evocou con preocupación as guerras que seguen desgarrando á humanidade, citando de maneira expresa Gaza e Ucraína, sen esquecer outras guerras menos visibles en África, Asia ou América. Á vez, convidou a mirar as “guerras próximas”, as que xorden nas familias, entre amigos ou nas comunidades, lembrando que a paz mundial comeza nos xestos cotiáns e nas relacións máis próximas.

Finalmente, o arcebispo exhortou a non reducir a paz a un ideal abstracto, senón a asumila como compromiso concreto dos crentes, vivido día a día: “Vaiamos ao encontro de Deus e indo ao encontro de Deus atoparemos a paz verdadeira”.

Previous articleA comunicación dixital da Arquidiocese de Santiago afiánzase e crece ao longo de 2025
Next articleMensaxe do Papa para a Xornada Mundial da Paz 2026: «¡Abrámonos á paz!»