Español
Galego
Luns, 16 de outubro de 2023. Salón de Actos da Parroquia de Carballo. O arcebispo de Santiago de Compostela, mons. Francisco Prieto, presentou as liñas xerais da Programación Diocesana para o curso 2023/2024, co lema “Facede isto en memoria miña”, encadrado dentro do Plan trienal 2022/2025 “Poñédevos en camiño”.
Mons. Prieto convidou os asistentes a “poñerse, de novo en camiño”, , como “Peregrinos de esperanza”, tendo como horizonte o Xubileu Romano de 2025”. Trátase de perseverar, desde unha esperanza comprometida, en tres aspectos ou dimensións fundamentais da vida comunitaria da fe: na comuñón, na fracción do pan e a oración e no testemuño”.
O arcebispo destacou, por unha banda, que ser cristián é unha vocación e non unha inscrición, xa que o cristián está chamado a ser discípulo e a acoller a fe como unha opción persoal (non meras tradicións ou costumes) e, por outra banda, ser cristián é ser discípulo en comunidade, “no sentido de que non percorremos sós o camiño da fe: somos individuos, pero non individualistas, nacemos á vida de fe (bautismo) nunha comunidade, nunha familia: Igrexa. O don de ser Igrexa é tarefa compartida por todos os bautizados”.
O prelado compostelán tamén indicou que “somos Igrexa (comunidade de discípulos) en Santiago de Compostela con horizonte universal, xa que temos unha historia: persoal, social, cultural… e cristiá, e vivimos o local con sentido católico”. E engadiu que “acollemos e agradecemos o recibido, pero sen limitarnos a repetir sempre o mesmo, polo que temos que evitar particularismos posesivos e excluíntes, xa que as divisións e as fronteiras anulan o Evanxeo”.
Don Francisco convidou tamén a formarse, fundamentalmente para afondar na vida cristiá, para crecer no compromiso eclesial e social, para ofrecer un testemuño máis claro do Evanxeo e para promover e provocar un camiño de formación e maduración, o que conleva a un crecemento da vida de fe. Pero esta formación, engadiu, “non é exclusiva ou prioritariamente doctrinal, senón que ten que ser un crecemento no amor: resposta ao amor primeiro, que nos identifica como cristiáns”.
Neste sentido, mons Prieto afirmou que a fe é un don de Deus que precisa ser alimentado e robustecido (oración, celebración, caridade), e que é preciso facer unha reflexión sobre a fe profesada, celebrada, vivida e rezada: ·unha adhesión ao Evanxeo máis consciente e vigorosa (…) Debemos descubrir e valorar a importancia da inserción da vivencia e formación da fe no ámbito comunitario: parroquia, grupos ou movementos…”.
