- O encontro celebrarase do 11 ao 13 de novembre en San Martiño Pinario e abordará o encontro con Cristo, o acompañamento e a formación de discípulos misioneiros.
Santiago de Compostela será escenario, do 11 ao 13 de novembro, das Xornadas de Piedade Popular, organizadas pola área de Piedade Popular da Comisión Episcopal para a Evanxelización, Catequese e Catecumenado. A Hospedería San Martiño Pinario será a sede do encontro, que leva por título «A piedade popular como lugar teolóxico para a evanxelización», con referencia ao número 126 da exhortación apostólica Evangelii gaudium.
O programa combinará relatorios, intervencións breves, traballo en grupos e celebracións litúrxicas. Ao longo de tres días, os participantes reflexionarán sobre como as expresións de relixiosidade popular poden favorecer o encontro con Cristo, acompañar as necesidades das persoas e alimentar o compromiso evanxelizador das comunidades.
O encontro con Cristo e o sentido das expresións de fe.
As xornadas comezarán o mércores 11 de novembro coa acollida, ás 11.00 horas, seguida da oración e a presentación dos participantes. Ás 12.30 horas, o bispo de Palencia e responsable da área de Piedade Popular, monseñor Mikel Garciandía Goñi, pronunciará o relatorio que dá título ao encontro.
Pola tarde, o delegado de Catequese de Santiago de Compostela, Miguel López Varela, abordará «O encontro con Cristo». A continuación, Miguel da Mata, gardián da Comunidade de Santiago e director da casa de acollida de peregrinos, intervirá sobre o risco de que a piedade popular perda o seu significado.
O patrimonio relixioso e as súas posibilidades como espazo de evangelización centrarán a achega de David Muriel Alonso, director de proxectos da Fundación As Idades do Home e membro do seu equipo directivo. A sesión continuará cunha reunión por grupos e concluirá coa celebración da eucaristía con vésperas na parroquia de Santa María Salomé, ás 20.00 horas.
Unha relixiosidade encarnada que acolle e acompaña.
A segunda xornada comezará con laudes e adoración eucarística na capela do Seminario Maior. Ás 10.00 horas, Francisco Javier Fresno Campos, membro da área de Piedade Popular e delegado de Piedade Popular e Irmandades e Confrarías de Zamora, ofrecerá o relatorio «A piedade popular, unha relixiosidade encarnada».
O acompañamento e a realidade dos mozos terán tamén un lugar nesta sesión. Frei Jordi Alcaraz, franciscano conventual e gardián da Comunidade de Astorga, falará sobre «Acoller e acompañar». Pola súa banda, Fernando Moscardó Veigas, membro do equipo internacional de mozos Journey to Redemption, abordará «Os mozos e a súa necesidade de sanación». Tras estas intervencións, os asistentes volverán reunirse en grupos.
A tarde achegará a reflexión á experiencia da peregrinación. Ás 16.30 horas está prevista unha visita guiada á catedral desde unha clave de peregrino e, ás 19.30 horas, os participantes sumaranse á misa do peregrino.
Discípulos misioneiros e pastoral de peregrinación
O venres 13 de novembro, despois da eucaristía con laudes, a irmá Jadwiga Karczevska, agostiña da Conversión, presentará «Sígueme: unha proposta para facer discípulos misioneiros».
As intervencións posteriores centraranse en dous aspectos concretos da acción evanxelizadora. Joan María Mayol i Fàbregas, OSB, reitor de Montserrat, tratará os rituais de envío e despedida dos santuarios. Juan Melchor Seguí Sarrió, reitor da basílica da Virxe dos Desamparados de Valencia e vigairo de Evanxelización, expoñerá a necesidade de contar cunha vogalía de evangelización en cada xunta directiva.
Ás 11.30 horas terá lugar o acto conclusivo e a presentación da pastoral de peregrinación na Oficina do Peregrino. O encontro finalizará tras a comida.
