Constitución e primeira reunión do Consello Diocesano de Pastoral

O pasado 1 de febreiro de 2024, o Arcebispo de Santiago, Mons. Francisco Prieto decretou a renovación dos membros do Consello Diocesano de Pastoral convocando os sacerdotes e axentes de pastoral da Arquidiocese para realizar o proceso electoral dos seus representantes. O proceso de designación dos novos membros levou a cabo entre o 1 de febreiro e o 1 de abril de 2024.

O sábado 19 de outubro, o renovado Consello Diocesano de Pastoral celebrou a súa primeira reunión constitutiva na Sala Palatina do Mosteiro de San Martín Pinario. Tras a acollida e a oración inicial, o arcebispo de Santiago Mons. Francisco José Prieto Fernández saudou e agradeceu o compromiso dos novos membros. Acto seguido, o vigairo xeral, D. José Andrés Fernández Farto, leu o decreto de constitución do Consello e presentou aos seus 64 integrantes.

No discurso posterior, mons. Prieto subliñou a importancia do Consello Diocesano de Pastoral para a renovación pastoral da Igrexa que peregrina en Compostela, resaltando que debe ser unha folla de roteiro e un chamamento para camiñar xuntos como Igrexa diocesana: “O reto comeza agora, a ilusión afiánzase agora e a esperanza ten que tomar forma a partir de agora”, afirmou o arcebispo. D. Francisco trasladou ao novo Consello: “Quero contar con cada un de vós neste Consello Diocesano de Pastoral. Este debe ser o lugar onde se concrete toda a programación diocesana, avaliando, revisando e transmitindo as nosas accións. Non somos illas, somos unha Igrexa cunha longa historia e un presente que nos identifica a todos e cada un de nós”, expresou.

Mons. Prieto subliñou que todo plan pastoral debe ter como punto de partida e meta central o envío que o Señor fai á Igrexa e ao Pobo de Deus: “O Señor chámanos e envíanos. Non é a nosa iniciativa, senón que El conta connosco (…). Por iso, o Consello Diocesano de Pastoral reflicte toda a realidade da vida diocesana e é un instrumento ao servizo da Comuñón Eclesial”, afirmou.

Terminou facendo referencia a tres “a”: A primeira é a “a” de alegría, lembrando o saúdo do anxo a María ao comezo dos tempos novos. A segunda é de agradecemento, que convida a entrar na lóxica do don, rompendo a propia lóxica. E a terceira, é a “a” de acollida, como unha casa aberta que reflicte o amor do Pai.

Posteriormente, D. Rafael Casás Salgado foi elixido por unanimidade como novo secretario do Consello. Na mesma sesión, votáronse tamén os membros da Comisión permanente. Así, ademais do arcebispo mons. Francisco José Prieto Fernández, do vigairo de pastoral D. Francisco Javier Porro Martínez e do secretario do Consello D. Rafael Casás Salgado que son membros natos desa Comisión, foron elixidos en votación as seguintes persoas: representando aos clérigos, o Rvdo. D. Víctor Blanco Naveira; a representante da Vida Consagrada será a Irmá Ana María Fontes Mosquera e, finalmente, en nome dos laicos estarán a delegada Episcopal para as Misións, Dª. Fátima Noya Varela, o delegado Episcopal para o Laicado, D. Alfredo Losada Suárez e un membro da delegación Episcopal para a Mocidade e a Infancia, Dª. Laura Ruíz Roca.

Tras un breve descanso, o delegado episcopal de Infancia-Mocidade e Primeiro Anuncio, D. Javier García, presentou a proposta para un novo estilo de traballo pastoral, salientando a importancia de ter unha visión conxunta como Diocese. Subliñou a necesidade de desenvolver esta visión de maneira colaborativa, involucrando tanto ao Consello Diocesano de Pastoral como a outros organismos diocesanos. Esta formulación deu lugar a un enriquecedor diálogo entre os asistentes.

Finalmente, o vigairo de Pastoral, D. Francisco Javier Porro Martínez anunciou e convidou a participar na Asemblea Pastoral Diocesana de Representantes, que terá lugar o sábado 16 de novembro no colexio La Salle. Este evento, explicou, ten como principal obxectivo proporcionar un espazo de encontro das diferentes realidades diocesanas, con especial énfase na participación dos laicos que representan os novos arciprestados. “A xornada centrarase en pechar o ano 2024 e definir as claves pastorais para o ano 2025”, afirmou.