Español
Galego
Tendo cesado o Consello Diocesano de Pastoral -segundo establece o canon 513, §2 do vixente Código de Dereito Canónico e os Estatutos existentes-ao quedar vacante esta Sede de Santiago de Compostela pola aceptación do Santo Padre, o Papa Francisco, da renuncia presentada por mons. Julián Barrio, faise necesario proceder á constitución dun novo Consello que axude ao novo Arcebispo de Santiago de Compostela, mons. Francisco Prieto, no exercicio da súa misión pastoral mediante o estudo e a valoración das actividades pastorais na Diocese, así como a suxestión de conclusións prácticas sobre as mesmas (cf. Can. 511).
Por todo iso, o Arcebispo mons. Francisco Prieto e o Chanceler-Secretario, Elisardo Temperán, convocan a todos os sacerdotes e axentes de pastoral da Arquidiocese para proceder á renovación do mesmo, que se realizará segundo os vixentes Estatutos, aprobados mediante Decreto de data dezasete de xaneiro de dous mil vinte e catro (Reg. VI 0023/24) e as normas do presente Decreto.
A designación dos membros do Consello Diocesano de Pastoral deberá realizarse no período comprendido entre o 1 de febreiro e o 1de abril de 2024. Os responsables de organizar, animar e seguir as eleccións que se enumeran no n. 1.2. deste decreto enviarán as Actas correspondentes, así como o nome, apelidos e datos de contacto de cada elixido ao Sr. Vicario de Pastoral, o máis tarde o 15 de abril de 2024.
O novo Consello Diocesano de Pastoral da Arquidiocese de Santiago de Compostela constitúese por un período de cinco anos a partir da data da súa constitución.
