Español
Galego
No nome de toda a Igrexa diocesana de Santiago de Compostela, o arcebispo de Santiago, Mons. Francisco José Prieto Fernández, expresa a súa proximidade, solidariedade e oración polo pobo venezolano e pola Igrexa que peregrina naquela nación ante os graves terremotos que afectaron ao norte de Venezuela, causando numerosas vítimas mortais e feridos.
A profunda relación entre Galicia e Venezuela, marcada polos vínculos migratorios, culturais e familiares que unen a ambos os pobos, fai que o sufrimento dos nosos irmáns venezolanos sexa sentido de xeito especialmente próximo entre nós.
Esta proximidade faise tamén presente na nosa Igrexa diocesana a través de sacerdotes naturais de Venezuela que exercen o seu ministerio na Arquidiocese de Santiago de Compostela e enriquecen co seu servizo a vida das nosas comunidades.
A Arquidiocese invita a todos os fieis a unirse na oración polas vítimas, as súas familias e todos os damnificados, pedindo ao Señor que conceda o eterno descanso ás vítimas mortais, o consolo a quen perdeu a seres queridos ou se viron seriamente afectados, e a fortaleza necesaria para afrontar estes momentos de dor e reconstrución. Encomendamos especialmente á intercesión da Virxe de Coromoto a quen padece as consecuencias desta traxedia.
Confiamos tamén na xenerosidade e solidariedade de tantas persoas que, desde distintos lugares, traballan para aliviar o sufrimento dos afectados e contribuír á súa recuperación.
