Español
Galego
Hoxe, sábado 22 de febreiro, a comunidade das Calasancias de Pontevedra, xunto con toda a comunidade educativa do colexio, reuniuse para conmemorar o centenario da morte de San Faustino Míguez, fundador da Congregación das Fillas da Divina Pastora. O evento histórico estivo marcado por unha solemne Eucaristía presidida polo arcebispo de Santiago, Mons. Francisco Prieto.
A celebración comezou cunhas emotivas palabras pola Madre Superiora da comunidade, M. María Luisa González. Na súa mensaxe de benvida, destacou a importancia de San Faustino Míguez como sacerdote escolapio, subliñando a súa entrega ao camiño da santidade a través da educación e o acompañamento espiritual: “Queremos dar grazas a Deus porque nos sabemos e sentimos herdeiros dun tesouro compartido”.
A Eucaristía contou, ademais da Madre Superiora da comunidade, con M. Mª Angustias da Prata, vigaira xeral; M. Sacramento Calderón, delegada do Sector España-África-India; e M. Conchi Ruiz, directora titular do colexio. Ademais, asistiron as irmás da comunidade das Calasancias, alumnos, profesores e familias, que se uniron en oración e reflexión.
Na súa homilía, Mons. Prieto ofreceu unha profunda reflexión sobre a vida de San Faustino Míguez, destacando a súa autenticidade e sinxeleza como piares da súa santidade. O arcebispo salientou que a santidade non reside na realización de actos extraordinarios ou milagres, senón na autenticidade e coherencia co corazón de Deus. “Ser santos é algo ao mesmo tempo sinxelo e esixente”, afirmou Mons. Prieto, convidando os presentes a vivir como cristiáns auténticos, buscando sempre a verdade e a transparencia nas súas accións.
Mons. Prieto tamén subliñou que a vida é un agasallo ateigado de dons e animou os presentes para contemplar como están a utilizar este agasallo. Instounos a compartir con alegría e xenerosidade o que son e o que posúen: “Que a vosa vida sexa o mellor cántico, que a música da vosa vida non sexa amargura, tristeza, queixume, laios, senón gozo e alegría”.
O arcebispo abordou a tendencia humana a buscar recoñecemento, lembrando os ensinos de Xesús: “Se queredes ser os máis importantes, comezade por ser os últimos”. Neste sentido, convidou os presentes a abandonar o egoísmo e a dirixir a súa mirada cara ao corazón dos demais, escoitando con empatía e sen prexuízos, e promovendo unha escoita activa e un entendemento profundo das necesidades do próximo.
Mons. Prieto destacou que San Faustino Míguez é lembrado non só como un sacerdote exemplar, senón tamén como un educador e científico. Destacou a súa proximidade ao pobo como pastor e a súa entrega a unha educación sincera, centrada no desenvolvemento integral de cada neno e mozo. Así mesmo, resaltou a súa faceta científica e a súa habilidade para transformar os recursos naturais en medicina, lembrando a importancia de coidar tanto a alma como o corpo.
Nun xesto de recoñecemento, Mons. Prieto agradeceu ás Calasancias pola súa dedicación como custodias do legado de San Faustino Míguez. Animou a todos os presentes a seguir o exemplo do santo, abrazando unha vida de santidade, sacerdocio, educación, ciencia e curación: “Hai medicinas que temos que seguir tomando para que a saúde do corazón siga estando viva”, concluíu.
A celebración terminou cunha reflexión da directora titular do colexio, M. Conchi Ruiz, quen convidou aos presentes para pensar na importancia de San Faustino nas súas vidas: “unha invitación para dar grazas a Deus polo que el nos achega a cada un dos que estamos hoxe aquí. Seguro que para ningún é indiferente que o padre Faustino é xa alguén especial na nosa vida porque conectou coa nosa maneira de entender a educación”.
E engadiu: “convídovos a pechar os ollos, a pensar en quen é o noso fundador para ti e a darlle grazas a el e a Deus por cruzalo no teu camiño. Pídelle que te siga coidando, que te siga acompañando, que siga animando a túa maneira de educar, que sosteña a túa vocación calasancia cando esta se cambalee e que te axude a vivir coa radicalidad con que el se entregou á misión máis nobre, máis grande e máis sublime, a educación da infancia e a mocidade”.
A conmemoración do centenario da morte de San Faustino Míguez foi un momento de profunda reflexión e agradecemento, reafirmando o compromiso da comunidade calasancia de Pontevedra coa educación e os valores que el encarnou ao longo da súa vida. A celebración culminou cun sentido aplauso e o compromiso de todos os presentes de seguir adiante coa misión educativa inspirada polo legado do santo.
