Español
Galego
- A celebración diocesana tivo lugar este domingo, 11 de xaneiro, na Casa de Exercicios Espirituais
- O arcebispo mons. Francisco José Prieto presidiu o rito coincidindo coa festa do Bautismo do Señor
- Familiares, padriños, catequistas e párrocos acompañaron os adultos neste primeiro paso de fe
Durante a celebración, a Igrexa diocesana acolleu publicamente os candidatos, recoñecendo o seu desexo de iniciar un camiño de fe que non se vive en soidade, senón dentro da comunidade cristiá. A presenza de padriños, catequistas e familiares subliñou ese carácter eclesial do proceso.
Chamados e amados
O arcebispo centrou a súa homilía no sentido profundo do Bautismo do Señor e na experiencia de ser chamados por Deus. Partindo da pasaxe evanxélica do Xordán, lembrou que a “xustiza de Deus é misericordia” e que no Bautismo se manifesta un Deus que se achega á fraxilidade humana para ofrecer vida e salvación.
Dirixíndose especialmente aos catecúmenos, mons. Prieto subliñou que o camiño que agora comezan é ante todo un don: “Sodes fillos e fillas amados de Deus”, afirmou, convidándoos a acoller este tempo como unha graza e a aprender a ler a súa propia historia á luz desa chamada.
O arcebispo insistiu en que o catecumenado non é unha simple aprendizaxe teórica, senón un proceso vital para descubrir a acción de Deus na propia existencia. “Deus non forza a resposta”, sinalou, lembrando que a fe nace dunha resposta libre, acompañada pola Igrexa, que escoita, discerne e camiña xunto a cada persoa.
Un camiño progresivo de fe
A celebración deste domingo marca o inicio dunha etapa que se prolongará, polo menos, durante dous anos litúrxicos. Neste tempo, os catecúmenos percorrerán un itinerario de fe e vida cristiá no seo das súas comunidades, acompañados por catequistas e padriños, con celebracións progresivas que inclúen liturxias da Palabra, bendicións, escrutinios e ritos de entrega do Credo e do Noso Pai.
Tras o catecumenado, chegará a etapa chamada de “purificación e iluminación”, que coincide coa Coresma do segundo ano e prepara de maneira máis intensa para a recepción dos sacramentos, habitualmente na Vixilia Pascual ou durante o tempo de Pascua. A esta seguiralle a mistagoxía, tempo no que os novos cristiáns afondan na experiencia recentemente iniciada e no significado dos misterios celebrados, integrándose plenamente na vida parroquial.
A Igrexa que acompaña
Un dos acentos reiterados ao longo da celebración foi o do acompañamento. O rito de admisión e entrada non só dá comezo a un proceso persoal, senón que compromete a toda a comunidade cristiá a camiñar xunto a quen inicia este percorrido.
O delegado de Catequese e Catecumenado, Miguel López, lembrou, ao comezo dos encontros posteriores ao rito, que este tempo é unha etapa para aprender a escoitar a Deus, a recoñecer a súa voz nos acontecementos e nas persoas, e a vivir a fe sen présas nin esixencias atafegantes, coa confianza posta naquel que chama.
E a partir de agora, que?
O Rito de Ingreso (ou Admisión ou aceptación) ao Catecumenado marca o inicio formal da segunda etapa do camiño de fe dos adultos que desexan ser bautizados e recibir os restantes sacramentos da Iniciación Cristiá da confirmación e a Eucaristía. Con el acóllense aos candidatos como parte da familia eclesial e marca o comezo da preparación máis sistemática ou regrada dos catecúmenos. Trátase dun momento importante para os candidatos no que confirman o seu desexo de seguir a Cristo.
O período formativo do catecumenado, que agora inician, prolongarase polo menos durante dous anos litúrxicos. Desta maneira, o catecúmeno, acompañado polos seus párrocos, padriños e catequistas e seguindo o camiño de fe e vida cristiá da comunidade eclesial, e axudado polo seu catequistas e o exemplo e testemuño dos seus, coñeza a fe católica e aprenda a vivir a vida cristiá.
A terceira etapa, sucesiva ao “catecumenado” e chamada de “purificación e iluminación”, coincide coa Coresma do segundo ano. Neste período, os catecúmenos prepáranse intensamente para celebrar os tres sacramentos da iniciación cristiá na Vixilia pascual ou durante o tempo de Pascua, e cos que se fará cristián.
A esta seguiralle unha cuarta e última etapa, chamada da “Mistagoxía”. Un tempo no que se vive a recentemente estreada experiencia de ser cristiáns cos membros da comunidade parroquial e profúndase no significado vital dos misterios celebrados. Coincide co tempo litúrxico da pascua de Resurrección.
Ao longo destas tres etapas de preparación para o Bautismo, a Confirmación e a plena participación na Eucaristía, os catecúmenos irán celebrando progresivamente diversos ritos e celebracións, tanto nas súas parroquias ou comunidades de orixe como na Catedral compostelá. Entre eles atópanse as celebracións da Palabra, os exorcismos, as bendicións, os escrutinios e os ritos de entrega do Credo e do Noso Pai.
Un xesto con forte carga simbólica
A coincidencia do acto coa festa do Bautismo do Señor outorgou á celebración un significado especial. Nese contexto, a Igrexa compostelá puxo en primeiro plano a experiencia dun Deus que se achega, chama polo nome e abre un camiño novo.
Con este rito, a diocese de Santiago abre simbólicamente as súas portas a quen desexa formar parte da comunidade cristiá, convidándoos a iniciar un itinerario que os conducirá, paso a paso, á plena incorporación á vida da Igrexia.
