Español
Galego
O arcebispo de Santiago, monseñor Francisco José Prieto Fernández, participou na tarde deste domingo no XXXIX Remonte Marítimo-Fluvial conmemorativo da Traslatio Apostólica, un acto que reuniu a preto de catrocentas persoas a bordo de tres barcos e que recrea o lendario traslado dos restos do apóstolo Santiago desde Palestina ata Iria Flavia.
A xornada comezou ás 16:00 horas cun acto institucional no porto náutico de Cabo de Cruz, ofrecido polo alcalde de Boiro. Media hora máis tarde, as embarcacións partiron rumbo a Pontecesures, onde chegaron sobre as 18:00 horas. Alí celebrouse a tradicional bendición dos barcos por parte do arcebispo e un novo acto oficial, esta vez presidido polo alcalde de Padrón.
Esta emblemática peregrinación marítimo-fluvial, organizada pola Fundación Roteiro Xacobea do Mar de Arousa e Ulla, tivo a súa primeira singradura en 1965 seguindo o ronsel da barca de pedra que, segundo a tradición xacobea, levou os restos do apóstolo desde Jaffa ata Galicia. Desde entón, a fundación –creada en 1963 por José Luis Sánchez-Agostiño e actualmente presidida polo seu fillo, Javier Sánchez-Agostiño Mariño– mantén viva esta aposta pola tradición, a cultura e o turismo do Roteiro Xacobeo marítimo.
Os peregrinos, tras a chegada a Pontecesures, trasladáronse en autobús ata Padrón, onde visitaron o Pedrón, a antiga ara romana que, segundo a lenda, foi o lugar onde se amarrou a barca apostólica e que hoxe se conserva baixo o altar maior de la Iglesia de Santiago. Esta igrexa foi erixida xunto ao río Sar no ano 1133 por iniciativa do arcebispo Gelmírez.
A Fundación tamén aproveitou esta edición para render homenaxe a persoas e entidades que demostraron o seu compromiso coas súas actividades.
