O profesorado de Relixión reuniuse este sábado, 24 de outubro, na Casa Diocesana de Exercicios de Santiago para participar nunha xornada dedicada á arte e a música sacra como recursos educativos.
A actividade, titulada «Experiencia de Deus a través da arte: a música sacra», foi convocada polo Instituto Teolóxico Compostelán, a través da Sección de Formación do Profesorado de Relixión Católica de Galicia, no marco da formación continua que impulsa a Delegación para a Educación. A súa responsable, María Begoña Díaz García, coordinou o encontro.
A arte e a música sacra como recursos para a aula.
A xornada profundou na relación entre a arte e a música sacra e nas súas posibilidades como recursos para o ensino, a evanxelización e a transmisión dos valores cristiáns ao alumnado.
O programa reuniu como relatores a Ignacio Yepes Szumlakowski, director de orquestra e compositor de música clásica; Óscar Valado Domínguez, director do Departamento de Música Litúrxica da Conferencia Episcopal Española; e Pablo López Raso, profesor da Universidade Francisco de Vitoria.
A xornada estruturouse en dous bloques. As sesións da mañá expuxéronse baixo o título «A escoita de Deus», mentres que as da tarde dedicáronse ás «Claves para comprender a arte moderna relixiosa». Unha proposta que vinculou a formación do profesorado co coñecemento de expresións artísticas que permiten achegarse á fe e comprender a súa presenza na cultura.
Alzar a mirada para recoñecer a diversidade.
Durante a mañá, os participantes recibiron a visita do arcebispo de Santiago, monseñor Francisco José Prieto Fernández. Nas súas palabras con motivo da celebración de envío, agradeceu a súa vocación e o seu traballo cotián, e animounos a unir a preparación académica e pedagóxica cunha atención próxima ás circunstancias de cada alumno.
«Dar grazas a deus por cada un de vós» foi o punto de partida dunha intervención centrada no valor da tarefa educativa e na confianza que necesita quen a exerce. Prieto lembrou que a aprendizaxe ten os seus propios tempos e que acompañalo require preparación e paciencia, tanto cando resulta difícil espertar o interese como cando unha pregunta revela que un alumno comezou a pensar doutro xeito.
Desde esa realidade cotiá, invitou os docentes a «alzar a mirada» e a recoñecer a diversidade de quen ten diante. Nas aulas conviven alumnos que viven a fe nas súas familias, outros que apenas coñecen o cristianismo e quen mantén dúbidas ou senten distantes. Todos, sinalou, merecen «un ensino serio, comprensible e respectuoso».
Formación e diálogo para un ensino que respecte a liberdade.
Un dos eixos da súa intervención foi a responsabilidade específica do profesorado de Relixión dentro da escola. O arcebispo distinguiu a finalidade da catequese, que acompaña o crecemento na fe e a incorporación á comunidade cristiá, do ensino relixioso escolar, que contribúe á formación integral do alumno mediante o coñecemento da fe e o seu diálogo coa cultura e os demais saberes.
Esa tarefa, explicou, esixe estudo, competencia pedagóxica e unha formación que se renove. Supón coñecer ben os contidos, atopar o xeito de facelos accesibles a cada idade e escoitar as preguntas que xorden entre os estudantes.
Mons. Prieto destacou tamén a achega da materia á comprensión da Biblia, de Xesucristo e da visión cristiá do ser humano, así como as claves que ofrece para interpretar a historia, a arte e a literatura. A iso engadiu a reflexión sobre cuestións como a dignidade humana, a liberdade, a xustiza, o sufrimento e o coidado dos demais.
Neste contexto, subliñou que ensinar con fidelidade á identidade cristiá da materia é compatible cun respecto profundo á liberdade do alumnado. Acoller as obxeccións, favorecer o diálogo e aprender a expresar un desacordo sen descualificar forman parte, afirmou, da educación para a convivencia.
Acompañar a cada estudante.
O arcebispo destacou a importancia de atender a cada alumno e coñecer as súas circunstancias. Invitou a mirar máis aló as cualificacións ou dunha conduta difícil: «Pidamos ao Señor que o cansazo non nos leve a dar a ninguén por perdido».
O próximo Ano Santo Compostelán 2027 tamén estivo presente na súa reflexión. A partir do lema «Ao ver a estrela enchéronse de inmensa alegría», evocou a procura dos Magos e relacionouna co valor de preguntar, aprender e saír do coñecido.
O arcebispo tamén animou aos profesores para coidar a súa relación con Xesucristo mediante a oración, a Palabra e a Eucaristía, e a compartir o que viven. Lembrou, ademais, que educar é unha tarefa compartida con outros docentes, os equipos directivos e as familias.
«Hoxe a Igrexa exprésavos a súa proximidade e agradece a vosa tarefa docente», manifestou ao concluír, antes de pedir claridade para ensinar, sensibilidade para comprender e paciencia para acompañar a aprendizaxe de cada alumno.
