O arcebispo de Santiago pide á mocidade europea “volver ao Evanxeo” para renovar a esperanza en Europa

O arcebispo de Santiago de Compostela, monseñor Francisco José Prieto Fernández, interveu esta mañá mediante videoconferencia na presentación do Manifesto dos Mozos Cristiáns de Europa, celebrada na sala de prensa da Santa Sé. Desde Santiago de Compostela, o prelado convidou os mozos a ser “testemuñas auténticas” e a camiñar cara ás raíces cristiás de Europa para recuperar a súa verdadeira identidade.

Coa Catedral de Santiago xa recibindo aos peregrinos máis madrugadores, monseñor Prieto comezou a súa mensaxe evocando o sentido profundo do Camiño de Santiago como “unha experiencia e unha metáfora fermosa do camiño que temos que percorrer seguindo a Cristo, camiño, verdade e vida”.

Na súa intervención, lembrou as palabras de tres papas e que, ao seu xuízo, iluminan este tempo de procura para a mocidade cristiá. Citou a san Xoán Paulo II, quen en 1982 exhortaba: “Europa, se ti mesma. Europa, volve ás túas raíces”, unha mensaxe que considerou especialmente necesario hoxe para “volver ao Evanxeo e a unha vida transformada segundo o corazón de Cristo”.

Tamén mencionou a Bieito XVI, quen en 2010 advertiu que Europa non pode construírse só sobre a tecnoloxía e o desenvolvemento, senón que necesita unha fe viva: “Unha Europa da fraternidade e da transcendencia”, afirmou.

Finalmente, evocou a mensaxe do Papa Francisco aos peregrinos do Camiño de Santiago en 2024, cando destacou tres signos esenciais de toda peregrinación: o silencio, o Evanxeo e o amor concreto ao próximo. “O Papa Francisco lembrábanos que o outro signo é o Evanxeo, é Cristo mesmo, o Evanxeo e a causa do Reino de Dios’”, subliñou o arcebispo, animando aos mozos para vivir estes signos con autenticidade e a renovar a esperanza no continente europeo.

Monseñor Prieto concluíu a súa intervención citando a Dante Alighieri: “Aquí en Santiago renace a esperanza”. E engadiu que este renacer debe estenderse tamén “a Roma e Xerusalén, invocando a paz, e que por vós, os mozos, renaza de novo a esperanza nesta Europa que necesita volver ás súas raíces de vida nova, raíces de Evanxeo”.