- Na súa carta pastoral para Todos os Santos, monseñor Francisco José Prieto Fernández anima a diocese a coidar os demais, traballar pola xustiza e facer da lembranza dos mártires unha chamada á reconciliación.
O arcebispo de Santiago de Compostela, monseñor Francisco José Prieto Fernández, dedicou a súa carta pastoral para a solemnidade de Todos os Santos á vocación cristiá á santidade e ao testemuño de Luis Mosquera Caramelo, nacido na Coruña, que será beatificado o próximo 7 de novembro en Santander, xunto con outros 79 mártires.
Baixo o título «O amor de Deus ten a primeira e a última palabra», invita a recoñecer as pegadas de Deus en quen ensinou a crer, coidaron con paciencia ou mantiveron a esperanza en momentos difíciles. O seu recordo, sinala o arcebispo, anima a seguir o camiño do Evanxeo desde as circunstancias de cada persoa.
Unha fe que se expresa na familia e o traballo
Luis Mosquera Caramelo naceu na Coruña en 1900 e recibiu o bautismo na parroquia de San Xurxo. Esposo e pai de cinco fillos, será o primeiro xuíz español declarado beato. O arcebispo destaca a súa traxectoria como exemplo dunha fe que arraiga nas decisións cotiás e dá froito no servizo aos demais.
A súa preocupación pola dignidade dos presos ocupa un lugar especial na carta. Na súa familia e no seu traballo como xuíz atopou o espazo para seguir a Xesucristo, cunha forma de exercer a súa responsabilidade atenta á xustiza e ao coidado das persoas.
«Tamén hoxe necesitamos cristiáns que vivan a súa profesión e as súas responsabilidades con esa honradez e valentía», afirma monseñor Prieto, que invita a protexer a quen máis necesitan que se respecten os seus dereitos e a súa dignidade.
A memoria dos mártires, unha chamada á reconciliación
Luis Mosquera morreu mártir en Santander o 27 de decembro de 1936, no contexto da Guerra Civil. Ante a súa próxima beatificación, o arcebispo propón acoller o seu testemuño desde o perdón e a reconciliación, con respecto ao sufrimento de todas as vítimas: «A memoria dos mártires comprométenos a perdoar e a traballar por unha paz na que todos poidan recoñecerse irmáns».
Esa tarefa comeza tamén nas relacións máis próximas: escoitar a quen pensa doutro xeito, renunciar a unha palabra ferinte ou dar o primeiro paso para recuperar unha relación rota. O fogar, a escola, o traballo, a comunidade cristiá e a vida pública ofrecen oportunidades diarias para actuar con xustiza e sementar paz.
Un paso concreto no camiño da santidade
O arcebispo lembra que a chamada á santidade alcanza a todos os bautizados e pode atopar resposta en calquera idade e circunstancia, tamén no medio das fraxilidades privados. Por iso, anima aos fieis para dar un paso concreto: dedicar tempo a quen o necesita, pedir perdón ou atender mellor unha responsabilidade.
Para soster ese compromiso, invita a escoitar a Palabra de Deus, participar na Eucaristía e acoller a misericordia do Señor no sacramento da reconciliación.
A carta conclúe cun recordo aos defuntos e unha afirmación da esperanza cristiá: en Cristo permanece a unión con quen nos precederon. Monseñor Prieto desexa que a próxima beatificación de Luis Mosquera Caramelo impulse á comunidade diocesana a vivir o Evanxeo con alegría e a construír fraternidade alí onde cada persoa desenvolve a súa vida.






