Español
Galego
- A xornada, que se celebra este domingo 9 de novembro, invita os fieis a redescubrir a chamada universal á santidade na vida cotiá.
- A publicación A nosa Igrexa ofrece datos sobre a actividade pastoral, educativa, misioneira, caritativa e económica da Arquidiocese.
Con motivo desta xornada, o arcebispo de Santiago, monseñor Francisco José Prieto Fernández, dirixiu unha carta pastoral publicada na revista A nosa Igrexa, na que lembra que a santidade “non é un privilexio reservado a uns poucos, senón unha vocación universal que alcanza a cada persoa na súa realidade concreta”. Na súa mensaxe, o prelado subliña que o camiño da santidade non se atopa nos xestos heroicos, senón na fidelidade e o amor con que se vive o ordinario (o traballo, os estudos, a familia, as relacións persoais ou o compromiso social).
O arcebispo convida os fieis a vivir unha Igrexa sinodal, na que todos camiñen unidos, sen exclusións, compartindo a misión evanxelizadora nos distintos ámbitos da vida diocesana. “Ser cristián é unha vocación, non unha inscrición”, sinala, animando aos crentes a redescubrir as raíces da fe e a vivir a santidade desde a comuñón e a fraternidade.
Con motivo do Día de la Iglesia Diocesana, difundiuse a revista A nosa Igrexa, unha publicación que reflicte a actividade pastoral, educativa, misioneira, caritativa, cultural e económica da Arquidiocese de Santiago durante o ano 2024. Este documento constitúe un exercicio de transparencia e rendición de contas, ao recoller a conta xeral de ingresos e gastos da diocese, así como o alcance da súa acción social, educativa e pastoral.
A publicación inclúe tamén información sobre o programa X Tantos, co lema “O ben que fagas serache devolto”, que facilita a colaboración económica periódica ao sostemento de la Iglesia a través de cotas domiciliadas ou mediante o portal www.donoamiiglesia.es que permite realizar donativos de forma segura desde calquera dispositivo.
No ámbito da acción caritativa e social, a Arquidiocese de Santiago atendeu durante o último ano a un total de 134.299 persoas a través de 62 centros distribuídos por todo o territorio diocesano. Entre as principais actuacións, destacan os cinco centros dedicados á atención e mitigación da pobreza, que ofreceron axuda a 21.313 persoas, e as dezanove casas destinadas a anciáns, enfermos crónicos e persoas con discapacidade, que acolleron a 2.358 usuarios. Así mesmo, catorce centros traballan na tutela e acompañamento de menores e novos, con 4.210 persoas atendidas, mentres que o centro de rehabilitación para drogodependentes deu servizo a 634 persoas.
A diocese conta tamén con catro centros dedicados á defensa da vida e a familia, nos que foron atendidas 318 persoas, e tres centros orientados á promoción da muller e a atención a vítimas de violencia, que acompañaron a 195 mulleres. Ademais, trece centros de promoción laboral axudaron a 2.832 persoas no seu proceso de inserción e capacitación profesional.
De maneira complementaria, o labor de Cáritas Diocesana de Santiago, sostida polo traballo solidario de 2.800 voluntarios, permitiu acompañar a 46.551 persoas e beneficiar a outras 23.362 a través dos seus programas de atención social, formación e inserción. Pola súa banda, Mans Unidas, con 254 voluntarios activos, desenvolveu 31 proxectos de cooperación ao desenvolvemento en distintos países do mundo, con 2.697 persoas atendidas e 3.291 beneficiadas directamente.
