Español
Galego
- A celebración foi presidida polo arcebispo de Santiago de Compostela, mons. Francisco José Prieto, e reuniu a centos de fieis.
- O novo templo, dedicado á Santísima Trindade, nace como unha casa aberta a todos os diocesanos e especialmente aos sacerdotes.
- O proxecto impulsado por Víctor Blanco Naveira culmina un soño iniciado na infancia e convertido hoxe nunha realidade ao servizo da Igrexa diocesana.
A celebración coincidiu coa solemnidade da Santísima Trindade, unha data especialmente significativa para este lugar, onde cada recuncho, cada símbolo e cada espazo foron concibidos como unha catequese permanente sobre o misterio trinitario. As tres columnas do soportal, os símbolos das fontes distribuídas pola leira e numerosos elementos arquitectónicos lembran constantemente a presenza de Deus Pai, Fillo e Espírito Santo, convertendo o conxunto nunha expresión visible da fe que inspira o proxecto.
No centro desta Casa de Oración destaca ademais unha reprodución da soada Icona da Trindade de Andrei Rublëv, unha das representacións máis coñecidas deste misterio cristián e símbolo de comuñón, acollida e hospitalidade, aspectos profundamente vinculados á identidade de Raíña.
A Eucaristía foi presidida polo arcebispo de Santiago de Compostela, monseñor Francisco José Prieto Fernández, e concelebrada polo arcebispo emérito, monseñor Julián Barrio Barrio; o vicario xeneral, José Andrés Fernández Farto; o vigairo de Santiago, Juan González-Redondo, así como numerosos sacerdotes diocesanos.
A asistencia superou amplamente o esperado. Moitos fieis procedentes de parroquias próximas e de distintos puntos da diocese desprazáronse ata a Raíña para participar nunha xornada festiva e profundamente espiritual. Numerosas persoas seguiron a celebración desde as pantallas instaladas no exterior do templo, habilitadas para facilitar a participación de todos os asistentes.
Durante a cerimonia tiveron lugar diversos ritos litúrxicos: a bendición da igrexa, a bendición da sede presidencial e do ambón, a dedicación da altar e a bendición do sagrario, configurando así plenamente o novo espazo como lugar destinado ao culto e á vida sacramental.
Na súa homilía, o arcebispo vinculou a bendición do oratorio co significado profundo da solemnidade da Santísima Trindade. Destacou que Dios revélase non como unha realidade illada, senón como unha comuñón de amor que invita os crentes a vivir a fraternidade, a unidade e o encontro.
Monseñor Prieto subliñou que a Trindade non é un misterio afastado, senón unha presenza que habita na vida cotiá das persoas e as comunidades. Así mesmo, lembrou que a Igrexa está chamada a ser espazo de hospitalidade, acollida e comuñón, unha reflexión especialmente significativa nun lugar como Raiña, concibido precisamente para abrir as súas portas a todos.
“A Trindade móstranos que estamos chamados á comuñón, ao encontro e á fraternidade”, afirmou o arcebispo, quen tamén invitou os presentes a descubrir en cada persoa o reflexo do amor de Deus.
Noutro momento da súa homilía, monseñor Prieto fixo referencia ao lema da próxima visita do Papa a España, “Alzade a mirada”, animando aos fieis para abrirse a horizontes máis amplos de fe e esperanza. O arcebispo sinalou que alzar a mirada supón deixar atrás o illamento e as pequenas seguridades para mirar de fronte a Dios, aos demais e ao futuro con confianza, desde a certeza de saberse acompañados pola misericordia divina. 
A xornada concluíu co rezo do rosario, retransmitido por Radio María, nunha celebración que contou ademais coa presenza da imaxe da Virxe Peregrina de Radio María, reforzando o carácter mariano dun día vivido con intensidade polos asistentes. Un soño de infancia convertido en realidade
Un soño de infancia convertido en realidade
Desde os seus inicios, o complexo acolleu numerosos encontros de mozos, retiros, convivencias, grupos de formación, catequese, xornadas de oración e actividades pastorais de moi diversa índole. Tamén pasaron polas súas instalacións comunidades relixiosas, grupos parroquiais e sacerdotes de distintas dioceses.
Froito da experiencia de oración compartida xurdiu a Asociación Raíña, desde a que se impulsan diversos programas dirixidos a persoas en situación de vulnerabilidade ou risco de exclusión social.
Entre eles destaca o programa “Companio”, destinado a persoas maiores do medio rural, que atopan neste espazo actividades, convivencia e apoio emocional. Os testemuños de quen participa reflicten o profundo sentido de familia que se xerou ao redor do proxecto.
Así mesmo, a asociación desenvolve iniciativas no Centro Penal de Teixeiro, programas formativos relacionados coa agricultura ecolóxica, proxectos de igualdade dirixidos a mulleres do rural e itinerarios de inserción sociolaboral para persoas con dificultades de acceso ao emprego.
A iso súmase a empresa de inserción Primicias Raiña, que ofrece oportunidades laborais a persoas en situación de vulnerabilidade e favorece procesos de integración social a través do traballo.
Persoas procedentes de distintos países, maiores, novos, voluntarios e traballadores forman hoxe unha comunidade diversa unida por un mesmo espírito de acollida.
Precisamente esa dimensión humana foi unha das notas máis salientables durante a xornada de bendición. Para moitos asistentes, Raíña representa moito máis que un conxunto de edificios ou un centro de actividades. É unha experiencia de Igrexa onde a oración, a amizade, a solidariedade e a esperanza conviven de xeito natural.
Coa bendición da nova Casa de Oración, a Arquidiocese de Santiago suma agora un novo espazo de referencia para a evangelización, a oración e a acción social. Un lugar nado da fe perseverante dun neno que soñou cunha casa aberta a todos e que hoxe, décadas despois, ve como aquel soño continúa crecendo ao servizo de Deus, da Igrexa e de quen máis o necesitan.
