A parroquia de Tordoia celebrou as confirmacións dun grupo de mocidade nunha eucaristía presidida polo arcebispo de Santiago, monseñor Francisco José Prieto Fernández. Acompañados polas súas familias, catequistas e a comunidade parroquial, os confirmandos recibiron o sacramento cunha invitación para vivir a fe como unha decisión libre e a expresala no coidado de quen ten cerca.
O arcebispo agradeceu o labor de quen os acompañou durante a súa preparación e lembrou que a confirmación non supón un punto final. A celebración, explicou, forma parte dun camiño que continúa na comunidade, onde a mocidade ten un lugar propio e unha responsabilidade que asumir.
A parábola do banquete de vodas serviu de fío condutor a unha homilía centrada na chamada de Deus, a resposta persoal e a coherencia entre a fe e a vida. Mons. Prieto invitou aos confirmandos a comprender a súa presenza na celebración como algo que vai máis aló dun costume familiar ou dun trámite. Ser cristián, sinalou, implica descubrirse amado por Deus e responder a esa relación con liberdade.
Neste sentido, explicou que Deus non irrompe pola forza na vida das persoas, senón que espera a que cada unha lle abra a porta. Trasladou así á mocidade a importancia de facer súa a fe que recibiron, para que non quede reducida a unha rutina ou ao cumprimento dunha obrigación.
Mons. Prieto animou ademais á mocidade a non avergoñarse das súas crenzas. Fronte ao temor para mostrar a fe ante os compañeiros, puxo o acento na necesidade de revisar a indiferenza e o egoísmo, e de aprender a vivir cun corazón disposto a servir.
A homilía levou ese compromiso a situacións próximas: acompañar a un compañeiro que atravesa un mal momento, preguntar aos pais como están ou interesarse de verdade polas preocupacións doutra persoa. Xestos sinxelos que, subliñou, requiren escoitar e estar dispoñibles.
