Encuentro pastoral del arzobispo de Santiago con la comunidad parroquial de San Pedro de Mezonzo

  • Mons. Francisco José Prieto presidiu a Eucaristía e compartiu un encontro cos fregueses
Na mañá deste domingo 18 de xaneiro, o arcebispo de Santiago, monseñor Francisco José Prieto Fernández, realizou unha visita pastoral á parroquia de San Pedro de Mezonzo, onde celebrou a Eucaristía e mantivo un encontro cos fieis, acompañado polo párroco, Alfonso Rodríguez.
Durante a homilía, mons. Prieto situou a mensaxe ao redor da figura de Xesucristo, presentado como “luz das nacións” e “año de Deus que quita o pecado do mundo”. A partir das lecturas proclamadas, lembrou que Cristo é o servo anunciado polo profeta Isaías e o Fillo sinalado por Xoán Bautista, aquel en quen se nos dá “toda salvación, toda vida, toda graza e toda paz de Deus”.

O arcebispo convidou os fieis a traer ao altar a súa vida cotiá, con “preocupacións, ilusións e esperanzas”, e a poñelas ante o Señor. Subliñou que a luz de Cristo non é unha luz escondida, senón unha luz chamada a brillar no corazón de cada crente e no seo das familias e comunidades, como fonte de reconciliación, encontro e perdón.

Mons. Prieto tamén lembrou que Deus salva non desde a violencia, senón desde o amor que se dá: “Non hai amor máis grande que dar a vida”. Desde esa imaxe, animou a vivir unha fe que se exprese no servizo, na capacidade de cargar coa vida dos demais e na construción de relacións baseadas no perdón.

Tras a Eucaristía, o arcebispo mantivo un encontro cos membros da parroquia, un espazo de diálogo e convivencia que permitiu compartir inquietudes, esperanzas e a vida da comunidade. Nun clima cordial, mons. Prieto animou a seguir camiñando como Igrexa, conscientes das dificultades persoais e sociais, pero confiados na fortaleza que vén do Espírito.

 

Artículo anteriorConfirmaciones en Santa María de Simes
Artículo siguienteEn Iñás, el arzobispo destaca la vida consagrada de las Hijas de la Natividad y el espíritu de entrega heredado de Don Baltasar